في طنجرة الضغط نحط القليل من الزيت مع حبة بصل مقطعة رقيق وقطعة الدجاج (منقي ومغسول جيدا بالماء والملح والليمون) والملح والتوابل (الفلفل الأسود، الكركم، سكين جبير، فلفلة حمرة) والسمن نقلي الكل مليح من كل الجوانب على نار هادئة حتى تطلق الماء نضيف عليها حبة طماطم مقطعة على ربعة حتى هي نقليها مليح.

نضيف الماء غالي مانديرش بزاف نغلق الطنجرة ونخلي اللحم يطيب، منين يطيب نحيه ونحطو في صينية تدخل للفرن نكون دهنتها بشوية سمن وندخلو للفرن على درجة حرارة متوسطة باش يحمار،

وديك المرقة نزيد عليها الخرشف (كنت قطعتها ونقيتها وغسلتها مليح) غلقت على الطنجة ختيتها طيب نص طياب.

حليتها وضفت عليها البطاطا مقطعة بالطول. نغلق على الطنجرة ونخليها تصفر حتى طيب والمرقة تتجمر وتعقد، قبل ما نطفي عليها نضيف رشة خفيفة نتاع سكين جبير ونطفي
ملاحظة: * هاذيك الإضافة الأخيرة نتاع سكين جبير تزيدلها في البنة.
* كنت حطيت من قبل وصفة بالخرشف والزيتون حتى هي بنينة بلحم البقري.

كي طيب وتوجد المرقة نخرج الدجاج من الكوشة ونسربي في صحن التقديم.

وتقدم بألف صحة وهنا.