نحضر كل المكونات ونبدأ على بركة الله، أولا نفصل البياض عن الصفار، نحطو في إناء يكون ناشف تماما من الماء ونبدا نضرّب فيه (البياض) مع رشة ملح حتى تتشكل رغوة، ثم نضيف السكر بالتدريج مع الخفق المستمر

نصيحة: ✨باش يطلع البيض لازم يكون بحرارة المطبخ وإذا نسيتوه ما جبدتوهش بكري من الثلاجة نحطوه في ماء ساخن جدا لمدة 5 دقائق.

حتى نتحصل على منقار العصفور، نضيف صفار البيض بالتدريج مع الخفق المستمر.

نخلط حتى تتجانس تماما المكونات، نضيف عطر مزيج بين الفاني والزبدة، ثم نضيف الفرينة مخلطة مع الخمارة والنشاء (المايزينة) نغربلهم بطبيعة الحال، دخلتها برفق بالسباتول من تحت لفوق.

نتأكد أن النواشف نساجمو مع بعض نفرغ الخليط في صينية فيها ورق الطهي، كي نكون نفرغ الخليط من الأحسن نرفع الإناء باش الكيك يجي مهوي، نحاول نسوي السطح وفي الأخير نهز الصينية ونخبطها فوق سطح العمل باش نتخلصو من الفقاعات ويجي السطح مستوي.

نديــر خطـوط بالفرشيطة أو عود الشواء (يساعد لكي نتحصل على سطح مستوي كذلك)، ندخــل الصينيـة للفرن المسخن مسبقا على درجة حرارة متوسطة (180 درجة) مـدة الطهـي 15 دقيقة تقريبا. كي يطيب نخليه شوية يهدأ.
ملاحظة مهمة: ✔راه يدي لون موحد بدون ما نشعلو عليه من فوق.

ونقلبو على مشبك وننزع ورق الطهي بلطف ونخليها تبرد مليح، وقطعتها كما هو موضح في الصور، من الأحسن نمررو السكين خارج الإطار.

قطعتها إلى ثلاث قطع، جات رائعة وحتى إضافة المايزينة تعطيها لون أبيض وتزيدلها في الخفة، أما الباقي الجينواز استعملتو في تحية.

غلفتها ببابي فيلم (بلاستيك غذائي) ودخلتها للثلاجة لحين الإستعمال، وصفة ناجحة مائة بالمائة 👌🏻😋👌🏻