نحضر كل المكونات المطلوبة ونبدأ باسم الله، في إناء أو طاس حطيت الماء وضفت عليه غرفية الحمص وبديت نحلها بالفوي (الضراب اليدوي) ثم ضفت عليها الملح حسب الذوق والكمون وقطعتي الجبن مثلثات خلطت مليح وكملت كمية الماء (3 كيلات) غطيت الإناء وخليتو يرتاح في الثلاجة مدة 2 سوايع. كنت حطيت من قبل نفس الوصفة بالتفصيل لكن بدون الجبن.

ثم نضيف الزيت (نقصت منو 2 ملاعق كبار نضيفهم في الأخير) خلطت مليح وغطيت الإناء وخليتو يرتاح في الثلاجة مدة 2 سوايع.

في هاذ الوقت حضرت الصينية عندي شوية تسيل في الزوايا (القنوتة) جبت ملعقة كبيرة فرينة خلطتها في شوية ماء ولاتلي عجينة وكوليت بيها القنوتة كما هو موظح في الصور، باش سائل الكران ما يسيحش في الفرن، ندهنها بشوية زيت.

كي تفوت 2 سوايع نميسكي الخليط جيدا باش نتأكد أن الجبن ذاب تماما وفي نفس الوقت دير هاذيك الرغوة من فوق، نفرغ الخليط في الصينية المدهونة بالزيت، ومن فوق ضفت القليل من الزيت (حوالي ملعقتين كبار اللي خليتهم مقبيل).
ملاحظة: ✔الزيت والرغوة هما اللي يمدو هاذيك القشرة اللي تجي من فوق.

دخلت الصينية للفرن المسخن مسبقا على أعلى درجة مدة الطهي تقريبا 40 د (كي طاب من تحت شعلت عليه من فوق باش يدي لون ذهبي جميل). كي خرجتو من الفرن دردرت على جزء منو الكمون ويقدم مع الهريسة اللي يحب الحار.
ملاحظة : ✔من أسرار نجاح الكران الفرن لازم يكون سخون بزاف.
✔إذا كان الفرن تاعكم يشعل من فوق ومن تحت مدة الطهي تولي 20 دقيقة فقط.

وبألف صحة وهنا يجي بزاف 😋👌🏻😋بزاف بنين.