في عندنا في محلات تنظيف الفراخ تقدرى تشترى عظم الفراخ بتكون عبارة عن انهم بيخلوا الفراخ وبيسيبوا الاجنحة والرقبة وعظم الظهر والصدر والكيلو ب 10 جنيه

هتجيبى 2 كيلو مثلا وتنقعيهم في مية وخل وليمون ودقيق وملح لمدة ساعة

بعدها تغسليهم كويس وتحمريهم في حلة كبيرة لغاية ما تحسى ان لونهم بدأ يتغير

هتضيفى عليهم البصل والفلفل الاخضر والطماطم والبهارات والملح والفلفل الاسود وتقلبى تقلبتين وبعدين ضيفى مية كتير عليهم وسيبيهم لحد ما يستووا

طلعى العضم من الشوربة واخلى اللحم الموجود فيها وحطيه على جمب

رجعى العظم تانى للشوربة وزودى بصل مفروم تانى واى خضار عندك كرفس جزر اى حاجة وسيبيها تغلى على نار هادية لحد ما تقصر للنص

دلوقتى بقى عندك شوربة كتير تقدرى تقسميها واحلى من اى مرقة دجاج تقدرى تطبخى بيها اى حاجة محتاجة فيها شوربة

كمان بقى عندك لحم فراخ تقدرى تعملى بيه اى حاجة زى نجرسكو او تعملى منه حشوة للكريب مع بصل وفلفل اخضر كتير ممكن تعملى توبنج للبيتزا ممكن تحشى بيه جلاش ممكن تعملى شوربة فراخ بالكريمة ممكن تحطى عليه اضافات الشاورما او تعملى سلطة مكرونة او رز صينى او اى حاجة تحبيها

ممكن قبل سلق العظم تاخدى الاجنحة وتعملى بيها اى وصفة من وصفات الوينجز بتبقى تحفة

في المطاعم الكبيرة والفنادق بيعملوا الصوصات من شوربات بتكون مركزة وتركيز الشوربة بييجى من حاجتين الاول الاضافات الى بيضيفوها وتانى حاجة انهم بيسيبوها على نار هادية لفترات توصل ل8 ساعات وعلشان كده الصوص الى بناكله برة زى الديمى جلاس بنبقى مش عارفين اللذاذة بتاعته سرها ايه

تقدرى تعملى كده في عظم اللحوم والبحريات علشان كل مرة اكلك يبقى طعم وجميل