اول حاجه هنحضر العجينه بتاعتنا هنجيب الدقيق وننخله بالمنخول ودي خطوه مهمه جداً مش بس البيتزا ده كمان لاي حاجه بشتغل فيها في الدقيق علشان ساعات الدقيق بيرطب وبيعمل كتل بتبقي من رطوبه الجو فيفضل نجيب الدقيق اول بأول

هنضيف رشه ملح وسكر وهنكون حاطيين الخميره عشان تتخمر مع الماء الدافئه و السكر وهنضيف معلقتين كبار من زيت الزيتون ولو مفيش نحط زيت عادي وهنبدأ ندعك الزيت في الدقيق وهنحط البيضه ونقلب كويس وبعد كده هنحط الخميره الى اتخمرت ونعجن كويس لحد اما العجينه تلم معانا وتتغطي ونسيبها تتخمر لمده ساعة

في الوقت ده هنحضر الصلصة هنقطع الطماطم والفلفل ونضربهم في الخلاط ونقطع البصل ونفرم الثوم ونعمل الصلصة ونحطلها البهارات واهم حاجه نسيب الصلصة لحد اما تتسبك وتتقل معانا

وهنقطع الطماطم والفلفل جوليان وبعد كده هيتحطو في مصفاه جو طبق علشان ينزلو مايتهم مع شرائح الزيتون ودي خطوه مهمه جداً

بعد اما الصلصة تتسبك كويس نسيبها تبرد خالص ونبدأ نجيب الصينيه ندهنها ونفرد العجينه الى خمرت وبعد كده هنجيب شوكه وهنبدأ نعمل العجينه كلها الى فردناها بالشوكه وبعد كده نفرد الصلصة ونحط الخضار ونبشر الجبنة وتتحط في الفرن على درجه حراره متوسطه بتأخذ حوالي ثلث ساعة في الفرن وعشان نتأكد أن استوت كويس لازم تكون من تحت احمرت كويس

نطلعها بعد السوي وتتقطع وبألف هنا