بنخلط الطحين مع السمسم وحبة البركة وملعقة صغيرة كركم وملعقة صغيرة كمون وملعقة كبيرة ملح وبنعجن بالماء وبنضيف نص كاسة زيت زيتون مع العجين وبنقطع كرات وبنكورهم وبندهن صينية بالزيت الزيتون وبنتركهم يرتاحو نص ساعة

بنكون سلقنا الدجاج بالمطيبات اللازمة وقطعنا البصل مكعبات

بنحط الزيت بطنجرة عالنار وبنضيف البصل والهيل والكركم والكمون والملح وبنقلب هون مش ضروري يستوي البصل لانه رح يستوي داخل الفرن

بنضيف الدجاج المسلوق فوق البصل وبنقلب حتى ياخد لون وبتقدرو تقلوه قبل ما تضيفوه للبصل

بندهن صينية بزيت الزيتون وبنفرد اول كرة عجين الأفضل تكون رقيقة وبندهن الوجه بالزيت وبنفرد كمان عجين وبنحط فوقها وبنضيف طبقة من البصل والدجاج وبنفرد كرة عجين وبنضيف بصل ودجاج وهيك لحتى تخلص كمية العجين والبصل والدجاج ولازم تكون اخر طبقة عجين

بندهن الوجه بزيت الزيتون وبنعمل إشارة + بالنص علشان تستوي منيح بالفرن وبنغلفها بالقصدير وبالفرن لمدة ساعتين تقريبا او ساعتين ونص لحتى نفتح عليها ونلاقي العجين استوى وبنحمرها وبنقلبها وبتتقدم كوجبة غذاء دسمة عالغذا مع الشوربة والسلطة وهاي الاكلة بتعطي طاقة لهيك الأفضل نعملها بفصل الشتا وريته صحة وهنا