اول حاجه اغسلي الفرخه كويس🐔 بدقيق وانقعيها في مية وخل وعصير لمونه ومعلقة ملح حوالي ربع ساعه 📟

بعد كده طلعيها تتصفي وتكوني محضرة التتبيلة بتاعتها
بصلة مفرومة 🌰 و عليها ملح و فلفل ورشة بهارات وبابريكا
ادعكي بيها الفراخ كويس وفتحي كده بين اللحم والجلد وادعكي بالخلطة دي سيبيها علي مانعمل الرز

افرمي بصلة 🌰 حوطيها في الحلة وعليها بهاراتك اللذيذة : ملح فلفل وبهارات و توم وبصل بودر ورشة بابريكا ورشة كاري وكركم وجنزبيل
وطبعا البهارات دي حسب مانتي بتحبي وحسب حجم الفرحه وكمية الرز بس منزودش اوي عشان الطعم يظبط

شوحي بقا كل الكلام اللي فوق ده ع النار ولو عندك عود قرفة صحيح و واحدة لومي (ليمون مجفف) وقبل ماتحشي شيليهم

البصلة تدبل بس وريحة التوابل تطلع
حوطي عليهم كوباية الرز و شوحيه معاهم دقيقتين
بعدين حوطي كوباية مية وسبيها تغلي معاه ووطي النار لحد مايتشرب المية وبس كده اطفي عليه
عايزينه اقل من نص سوا كمان

هاتي الفرخه بقا واحشيها بالرز اللي عملناه واقفليها كويس بخيط
او كتفي رجليها

هاتي بقا الكيس الحراري وحوطي فيه معلقة دقيق وقلبيها فيه بحيث الكيس كله يتغلف بطبقه دقيق عشان الفراخ متلزقش فيه

حوطي الفرخه في الكيس واقفليه و بمقص او سكينة اعملي 3 فتحات كده في الكيس عشان ميفرقعش
فتحه صغيرة خالص اكنك بتخرمي الكيس بس

حوطي الكيس اللي جواه الفرخه في صنية غويطة و والصنية دي حوطي فيها كوبايتين مية
و كل ما المية تتبخر حوطي مية تاني
وتابعيها في الفرن هتاخد حوالي ساعه ونص ل ساعتين بس تتابعيها كل نص ساعه

طلعيها بالهنا والشفا 😘😘❤❤