સૌ પ્રથમ એક બાઉલમાં ચોખા, અડદની દાળ અને મેથીના દાણા ઉમેરી જરૂર મુજબ પાણી ઉમેરી રાત્રે પલાળી લો. સવારે પાણી નિતારી મિકસરના જારમાં થોડું પાણી ઉમેરી બારીક વાટી ડોસા માટેનુ઼ં મધ્યમ ખીરું તૈયાર કરો. ખીરામાં દહીં અને મીઠું ઉમેરી 4-5 કલાક માટે આથો આવે તે માટે ગરમ જગ્યાએ (તાપમાં)ઢાંકીને મૂકી દો.

બટાકાને બાફીને છોલીને નાના ટુકડા કરી લો, ડુંગળીને છોલીને લાંબી સમારી લો.

એક પેનમાં તેલ ગરમ કરી રાઈ, હિંગ, લીમડાના પાન અને ડુંગળી ઉમેરીને સાતંળો.

ડુંગળી સહેજ ગુલાબી થાય ત્યારે આદુની પેસ્ટ, લીલા મરચા, ગરમ મસાલો, હળદર, મીઠું અને બાફેલા બટાકા ઉમેરી બરાબર મીકસ કરી 5 મિનિટ ધીમી આંચે પકાવો.

તૈયાર કરેલ (મસાલા)પૂરણમાં સમારેલી કોથમીર ઉમેરી બરાબર મીકસ કરી ગેસ બંધ કરી દો.

એક મિકસરના જારમાં શેકેલી અડદની દાળ બારીક વાટી તેમાં નારિયેળના ટુકડા,થોડું પાણી ઉમેરી વાટી લો.તેમાં લાલ મરચું અને મીઠું ઉમેરીને ચટણી તૈયાર કરો. એક વગારીયામાં તેલ ગરમ કરી રાઈ, હિંગ અને લીમડાના પાન ઉમેરી સાતંળી તૈયાર ચટણીમાં ઉમેરી મિક્સ કરી દો, તૈયાર છે રેડ ચટણી..

નોનસ્ટિક તવાને ગેસ પર ગરમ કરી બનાવેલ ખીરામાંથી એક મોટો ચમચો ખીરું તવાની વચ્ચે મૂકી તે જ ચમચા વડે જ અંદરથી બહારની તરફ ગોળ ગોળ ફેરવી પાતળું ઢોસા બનાવો.

ઢોસાની ઉપર માખણ લગાવી રેડ ચટણી લગાવી બનાવેલ પૂરણ પાથરીને ઢોસાની ચારેય બાજુ તેલ લગાવો.

ઢોંસો ક્રિસ્પી થાય ત્યારે ઢોસાને આમે સામે વાળીને નીચેથી વાળીને, સહેજ દબાવીને ત્રિકોણ આકાર આપી, પ્લેટમાં કાઢી લો. આવી રીતે બીજા ઢોંસા બનાવી લો.

તૈયાર છે મસાલા ઢોંસા નારિયેળ ચટણી, સંભાર સાથે ગરમાગરમ પીરસો.