ओले काजूगर एका मायक्रोवेव्ह सेफ बाऊलमध्ये घेऊन त्यामध्ये अर्धा कप पाणी टाका आणि मायक्रोवेवमध्ये 25 ते 30 सेकंद गरम करून घ्या त्यामुळे त्याची साले सहजगत्या निघतील. (कोमट पाण्यात दहा ते पंधरा मिनिटे भिजवून ठेवल्यावरही काजूची साले सहज काढता येतात). प्रथम आपण वाटणाची तयारी करु- यासाठी एक छोटा कांदा उभा चिरून आणि ओला नारळ हे एक टेबलस्पून तेलामध्ये व्यवस्थित भाजून घ्या आणि थंड झाल्यावर मिक्सरमधून पाणी घालून त्याचे वाटण करून घ्यावे.

दुसर्‍या एका मोठ्या कढईमध्ये एक ते दीड टेबलस्पून तेल घालून जिरा हिंगाची फोडणी करून घ्यावी आणि त्यामध्ये बारीक चिरलेला कांदा गुलाबी रंगावर परतुन घ्यावा. नंतर त्यात आलं लसूण मिरची पेस्ट टाकून तीही थोडीशी परतून यामध्ये ओले काजूगर घालावेत. ओले काजूगर एक ते दोन मिनिटे व्यवस्थित परतल्यावर कढईवर झाकण ठेवून वाफेवर तीन-चार मिनिटे शिजू द्यावेत. नंतर त्यामध्ये ओले मटार घालून व्यवस्थित मिक्स करावे आणि या मिश्रणामध्ये हळद हि घालून घ्यावी.

वरील मिश्रण वाफेवर चार ते पाच मिनिट शिजल्यावर नीट मिक्स करून त्यामध्ये टोमॅटो घालून एक वाफ आणावी नंतर मालवणी मसाला चवीनुसार मीठ आणि तयार केलेले वाटण घालावे. त्यात जरुरीनुसार पाणी घालून व्यवस्थित चांगली उकळी आणावी. सर्वात शेवटी त्यामध्ये लोणी घालून छान उकळी आणून वरतून हिरवी कोथिंबीर पेरून गॅस बंद करावा