तांदूळ धुवून निथळून १५ मिनिटं ठेवा.

बदाम गरम पाण्यात भिजवून ठेवा ; केशर गरम दुधात भिजवून ठेवा.

एका पातेल्यात अर्धा चमचा तूप घालून त्यात काजू मंद आचेवर तळून घ्या. ताटलीत काढून ठेवा.

त्याच तुपात बेदाणे (किसमिस) तळून घ्या आणि ताटलीत काढून ठेवा.

पातेल्यात आणखी अर्धा चमचा तूप घालून लवंगा घालून तळून घ्या. लवंगा बाहेर काढू नका.

त्यातच तांदूळ घालून सुके होईपर्यंत परतून घ्या.

आता पातेल्यात ४ कप गरम पाणी घाला. चिमूटभर मीठ घालून भात शिजवून घ्या. मी राईस कुकर मध्ये भात शिजवते. भात छान मोकळा झाला पाहिजे. भात गार होऊ द्या.

बदाम सोलून त्याचे पातळ तुकडे करून घ्या.

एका कढईत नारळ आणि गूळ घालून मंद आचेवर शिजवा. मिश्रण एकजीव झाले की त्यात शिजलेला भात घाला.

भातात बदाम, काजू, बेदाणे, केशर घालून मिक्स करा.