માપમાં દર્શાવ્યા પ્રમાણે ઘઉં ચોખા અને ચણાનો લોટ ચાળીને ૨ ટેબલસ્પૂન તેલનું મોણ નાખી મિક્સ કરી લો.

હવે આ લોટમાં મીઠું, હળદર, મરચું, ધાણાજીરુ,વલીયારી,આમચૂર પાઉડર, ખાંડ, હિંગ, લસણ આદુની પેસ્ટ નાખી બરાબર મિક્સ કરી લેવું અને હૂંફાળા પાણી વડે સહેલાઇથી મુઠીયા વાળી શકાય તેવો ઢીલો લોટ બાંધવો. અને સ્મૂધ કરી લેવો.

મુઠીયા બાફવા મૂકવા માટેનું વાસણ પહેલેથી ગરમ કરી લેવું.હવે બંને હથેળીમાં તેલ લગાવી અને તેના મુઠીયા વાળી લેવા. અને વરાળે ૧૫ મિનિટ સુધી બાફવા મૂકવા.

15 મિનિટ બાદ ગેસ ઓફ કરી મુઠીયા ને એક પ્લેટમાં કાઢી તેને ઠંડા થવા દેવા. ઠંડા થાય પછી તેના પીસ પાડવા. હવે એક કડાઈમાં એક ટેબલસ્પૂન તેલ મૂકી, ગરમ થાય એટલે તેમાં રાઈ,તલ, મીઠી લીમડી, ૨ સૂકા લાલ મરચાં નાખી તેને સાંતળી અને તેમાં પીસ કરેલા મુઠીયા એડ કરો. પાંચ મિનિટ માટે ધીમા તાપે શેકો. પછી ગેસ ઓફ કરી દો. આ મુઠીયા દહીં સાથે, છાસ સાથે, ચા સાથે ટેસ્ટી લાગે છે.