ચૈત્ર માસનો પ્રથમ દિવસ એટલે લીમડાનો મોર, વરિયાળી અને સાકર ભગવાન ને ધરાવી તેનો રસ બનાવ્યો જે અમે બધા આખો મહિનો પીશું.

ચૈત્ર મહિનામાં લીમડાનું સેવન કરવાની સલાહ શાસ્ત્રોમાં આપી છે જે ખૂબ વૈજ્ઞાનિક છે. આપણા ત્યાં ચૈત્ર મહિનામાં લીમડાનું પાણી પીવાનો કે લીમડાના ફૂલનો વપરાશ કરવાનો રિવાજ છે. જેના દ્વારા આપણું આરોગ્ય બારેમાસ જળવાઈ રહે છે. આમ સમગ્ર વર્ષ આરોગ્યમય પસાર કરવા કડવા લીમડાના મીઠા ગુણ જાણવા આવશ્યક છે.
ચૈત્ર મહિનાથી સામાન્ય રીતે કાળઝાળ ગરમીના દિવસો શરૂ થતા હોય છે. આપણા શાસ્ત્રોમાં જણાવ્યું છે કે લીમડાના પાકા પાન કરતાં કુણા પાન વધુ ઠંડક આપે છે અને કુણા પાન કરતાં પણ વધુ ઠંડક તેના ફુલ આપે છે. જેથી ચૈત્ર મહિનામાં લીમડાનું સેવન કરી ઠંડક મેળવવા ઉપરાંત અનેક રોગોથી બચી શકાય છે. ગરમીની ઋતુમાં શરીરના દર્દો જેવા કે પિત્તપ્રકોપ, તાવ, પેટની ગડબડી, અજીર્ણ, ચામડીના રોગો, ઓરી-અછબડા, શીતળા વગેરે અનેક રોગોમાં લીમડો અતિ ઉપયોગી છે.