प्रथम किसलेले खोबरे थोडे गरम करून घेणे.जास्त भाजायचे नाही. त्याच कढईत साजूक तूप घालून रवा गुलाबीसर भाजून घेणे व थंड होण्यासाठी ठेवावा.

एका पातेल्यात 1/4 कप पाणी व गूळ घालून गॅस वर ठेवावे. *पाणी कमी झाले तरी चालेल, जास्त नको.गूळ नुसता विरघळून घ्यायचा आहे.पाक करायचा नाही. गॅस बंद करावा.पाणी गार होऊ द्यावे.

गुळाचे पाणी थंड झाल्यावर त्यात सुंठ पावडर, वेलची पावडर, खोबरे घालून मिक्स करून घेणे.नंतर भाजलेला रवा घालून व्यवस्थित मिक्स करून घेणे.झाकण ठेऊन 8-10 तास छान मुरू द्यावे.**गरम पाण्यात रवा घालू नये.तो शिजू शकतो. म्हणून सर्व थंड झाल्यावर मिक्स करावे.रात्रभर ठेवले तरी चालेल.

एका वाटी मध्ये मैदा, रवा मिक्स करून घेणे. तुपाचे मोहन घालून पिठाला चांगले चोळून घ्यावे.पिठाची मूठ तयार झाली पाहिजे. थोडे, थोडे पाणी घालून मध्यम घट्ट भिजवून घेणे.झाकून 1/2 तास भिजत ठेवावे.

रव्याचे सारण घट्ट झालेले असेल ते, चमच्याने सैल करून व मोकळे करून घेणे. रात्रभर गुळाच्या पाण्यात रवा छान मुरतो.कणीक पुन्हा मळून घेणे व त्याचे छोटे गोळे घेणे.

दोन पुऱ्या लाटून घेणे.एक सारख्या आकाराच्या. एका पुरीवर मध्यभागी सारण भरून घेणे. कडेने बोटाने पाणी लावून घेणे.दुसरी पुरी त्यावर ठेवून कडेने व सारणाच्या बाजूने दाबून घेणे.

कापणीने कडेचे पीठ कापून घेणे. सांजोरी तयार. याप्रमाणे सर्व सांजोरी करून घ्याव्यात.

गॅसवर कढई तापत ठेवून त्यात तेल घालणे. तेल तापले की, गॅस मध्यम आचेवर ठेवून सांजोरी दोन्ही बाजूंनी छान तळून घ्याव्यात.