கடலைப் பருப்பையும், துவரம் பருப்பையும் ஒரு பாத்திரத்தில் போட்டு தண்ணீர் ஊற்றி அரை மணி நேரம் ஊற வைக்கவும். புளியை தண்ணீரில் போட்டு ஊற வைக்கவும்.

பிறகு ஒரு மிக்ஸி ஜாரில் வரமிளகாய், பூண்டு பல், சீரகம், கால் ஸ்பூன் சோம்பு போட்டு அரைக்கவும்.

பிறகு அதே மிக்ஸி ஜாரில் ஊறவைத்த பருப்பை தண்ணீர் வடித்து விட்டு அதில் போட்டு கொரகொரப்பாக அரைக்கவும்.

அரைத்த பருப்பை ஒரு பாத்திரத்தில் மாற்றிக் கொள்ளவும். பிறகு அதில் பொடியாக நறுக்கிய வெங்காயம்,கொத்தமல்லித்தழை,கறிவேப்பிலை, உருண்டைக்கு தேவையான அளவு உப்பு, பெருங்காயத்தூள் போட்டு ஒன்று சேர்த்து பிசையவும்.

பிசைந்த மாவை சிறு சிறு உருண்டைகளாக உருட்டி வைத்துக் கொள்ளவும் பிறகு உருண்டைகளை இட்லி பாத்திரத்தில் வைத்து 5 நிமிடம் வேகவைத்து எடுக்கவும்

பிறகு ஒரு மிக்ஸி ஜாரில் தேங்காய் துருவல் சோம்பு போட்டு அரை டம்ளர் தண்ணீர் ஊற்றி மைய அரைக்கவும்.

அடுப்பில் ஒரு கடாயை வைத்து இரண்டு ஸ்பூன் எண்ணெய் ஊற்றி எண்ணெய் சூடானதும் வெந்தயம், சோம்பு போட்டு தாளிக்கவும். பிறகு பொடியாக நறுக்கிய வெங்காயம், கறிவேப்பிலை, தக்காளி போட்டு வதக்கவும்.

பிறகு ஊற வைத்த புளியை கரைத்து அதில் ஊற்றி மிளகாய் தூள் மல்லித் தூள் போடவும்.

பிறகு மஞ்சள்தூள் தேவையான அளவு உப்பு போட்டு 2 டம்ளர் தண்ணீர் ஊற்றி 5 நிமிடம் கொதிக்க விடவும்.குழம்பு கொதி வந்தவுடன் வேக வைத்த உருண்டைகளை அதில் போட்டு 5 நிமிடம் வேக விடவும்.

பிறகு அரைத்து வைத்த தேங்காய் விழுதை அதில் ஊற்றி 5 நிமிடம் கொதிக்க விடவும். பிறகு பரிமாறவும்.