કેરીને ધોઇ કોરી કરી નાના ટુકડા કરી હળદર અને મીઠુ નાંખી ૧૨ કલાક સુધી ઢાંકીને રાખવા. ૨-૩ કલાકે ઉછાળીને હલાવતા રહેવું. કેરીના ટુકડામાંથી નીકળેલું પાણી અલગ રાખી કેરીનો કપડાંમાં રાખી ૧૦-૧૨ કલાક કોરી થવા દેવી. તડકામાં રાખવાની જરુર નથી. ગુંદાને હાથથી દબાવી ઠળિયો કાઢી મીઠાવાળી આંગળી ફેરવી બધી ચીકાશ કાઢી લેવી.

હવે એક મોટ વાસણમાં બહારની બાજુ રાઇના કુરીયા, મેથીના કુરીયા, વરિયાળી, હીંગ, સુકા મરચા, તજ, તમાલપત્ર કાળામરી ગોઠવવા. એક ફ્રાય પેનમાં ૨-૩ ચમચા તેલ ધુમાડો નીકળે ત્યાં સુધી ગરમ કરવું. ધુમાડો નીકળતો બંધ થાય તરત જ તૈયાર મિશ્રણમાં તેલ ઉમેરી ૨ મિનિટ માટે ઢાંકી લેવું. પછી ધાણાના કુરીયા અને ઇન્સ્ટન્ટ અચાર મસાલો મિક્સ કરી ૪-૫ મિનિટ માટે ઢાંકી લેવું. છીણેલી કેરીમાંથી હાથથી પાણી નીચોવી લેવું. આ કેરીને મસાલામાં મિક્સ કરવી.

હવે ગુંદામાં દબાવીને મસાલાને ભરવો. હવે જે બરણીમાં અથાણું સ્ટોર કરવાનું હોય તેમાં ભરેલા ગુંદા, કેરીના ટુકડા અને વધારાનો મસાલો (બોરો) દબાવીને ભરવા. ૫૦૦ ગ્રામ તેલ ગરમ કરી ઠંડું થાય પછી બરણીમાં રેડવું. તેલ સપાટી ઉપર રહે તેટલી માત્રામાં રાખવું.

અથાણા માટે હું કેસર કેરી લઉ છું. અને શીંગતેલનો ઉપયોગ કરું છું. સરસવના તેલનો પણ ઉપયોગ કરી શકાય છે.