બટાકા ને ધોઈ છોલી ને મધ્યમ જાડાઈના લાંબા ટુકડા માં કાપી લેવા. પાણીમાં બે થી ત્રણવાર ધોઈ લેવા અને દસ થી પંદર મિનિટ માટે પાણીમાં ડુબાડી રાખવા. સોસ બનાવવા માટેના બધા શાકભાજી તૈયાર કરવા.

હવે બટાકા માંથી પાણી નિતારી લઈને બટાકાના ટુકડા ની ઉપર કોર્ન ફ્લૉર, મીઠું અને મરી ભભરાવવું. બધું બરાબર મિક્સ કરી લેવું જેથી કરીને બટાકા ના બધા ટુકડા ઉપર કોર્ન ફ્લૉર બરાબર ચોંટી જાય.

એક કઢાઈમાં તેલ ગરમ થાય એટલે એમાં બટાકાના થોડા ટુકડા ઉમેરીને હાઈ હીટ પર ગોલ્ડન બ્રાઉન કલર ના તળી લેવા. એક સાથે ઘણા બધા ટુકડા ઉમેરવા નહીં. આ રીતે બધા બટાકા તૈયાર કરી લેવા.

સૉસ બનાવવા માટે એક પેનમાં તેલ ગરમ કરી તેમાં કરી પત્તા ઉમેરવા. હવે તેમાં આદુ, લસણ અને મરચા ઉમેરીને લસણ ગુલાબી રંગ નું થાય ત્યાં સુધી સાંતળવું. હવે તેમાં કાંદા અને કેપ્સિકમ ઉમેરીને હાઈ હીટ પર 1 મિનીટ પકાવવું. હવે તેમાં શેઝવાન સૉસ, સોયા સોસ, ટોમેટો સોસ અને મીઠું ઉમેરીને બધું બરાબર મિક્સ કરી લેવું.

કોર્ન ફ્લૉર ને અડધા કપ પાણીમાં મિક્સ કરીને સ્લરી બનાવી લેવી. હવે આ મિશ્રણને પેનમાં ઉમેરીને બધું બરાબર હલાવી લેવું. હાઈ હીટ પર સૉસ થોડો જાડો થઈ જાય ત્યાં સુધી પકાવવું. હવે તેમાં તળેલા બટાકા ઉમેરીને બધું બરાબર મિક્સ કરી લેવું અને બે મિનીટ સુધી પકાવવું. હવે તેમાં લીલી ડુંગળી ઉમેરી બધું મિક્સ કરીને ગેસ બંધ કરી દેવો. થોડી લીલી ડુંગળી ઉપરથી સજાવવા માટે અલગ રહેવા દેવી.

ડ્રેગન પોટેટો ને લીલી ડુંગળી થી સજાવી ને પીરસવું. આ ડીશ સ્ટાર્ટર તરીકે અથવા તો સાઈડ ડિશ તરીકે પીરસી શકાય.