સૌ પ્રથમ રવો અને ઘી ને આંગળી વડે બરાબર મિક્સ કરવું. હવે તેમાં હળદર, જીરું, મરી અને મીઠું ઉમેરવા. બરાબર હલાવી લઈને તેમાં મેંદો અને બેકિંગ પાઉડર ઉમેરવા. બધું બરાબર મિક્સ કરીને ઠંડું પાણી ઉમેરતા જવું અને કઠણ લોટ બાંધી લેવો. લોટને બે થી ત્રણ મિનિટ માટે મસળવો. ઢાંકીને 15 મિનિટ માટે રહેવા દેવો.

લોટમાંથી એકસરખા 24 ભાગ કરી લેવા. હવે એક ભાગ લઈને તેમાંથી જાડી પુરી વણી ચપ્પુ ની મદદ થી એમાં કાપા કરી લેવા. આ રીતે પાંચ છ પુરી એક સાથે તૈયાર કરી લેવી.

તેલ ને મીડીયમ તાપે ગરમ કરવું. હવે તેમાં તૈયાર કરેલી પુરી ઉમેરીને મીડીયમ તાપ પર એક મિનિટ માટે તળવી. ત્યારબાદ ગેસ ધીમો કરીને પુરી હલકા ગુલાબી રંગની થાય ત્યાં સુધી તળવી. આ પુરી તળાતી હોય ત્યારે બીજી પુરી વણી લેવી કેમ કે પુરી તળાતા ઘણી વાર લાગે છે. પુરી ને ધીમા થી મીડીયમ તાપે તળવી નહિતર ક્રિસ્પી બનશે નહીં.

ફરસી પુરી ને ચા કે કોફી સાથે સર્વ કરવી.