मूग ८ ते ९ तास कोमट पाण्यात भिजवावेत. त्यांना मोड काढून ते शिजवून घ्यावे. शिजवताना थोडे मीठ व हळद घालावी. त्याने मूगाचा उग्रपणा कमी होतो तसेच रंगही येतो.
उकडलेला बटाटा नीट कुस्करून घ्यावा. त्यात शिजलेले मूग घालावे, चवीपुरते मीठ आणि चाट मसाला घालावा.

चिंचेचे गोड पाणी:
एका भांड्यामध्ये खजुर व चिंच घेऊन त्यात पाणी घालावे.चिंचे मध्ये चिंचोके नाहीत ना याची खात्री करून घ्यावी. असतील तर काढून टाकावेत. खजुरातील बिया काढून टाकाव्यात आणि १० मिनिटे शिजवून घ्यावी. शिजवलेल्या मिश्रणाची मिक्सरला बारीक पेस्ट करून घ्यावी. आता एका भांड्यामध्ये ही पेस्ट घ्यावी व त्यामध्ये गूळ आणि मीठ घालून हे मिश्रण गूळ विरघळेपर्यंत शिजवून घ्यावे. हे पाणी थंड करून घ्यावे.

तिखट पाणी:
मिक्सर च्या भांड्यामध्ये पुदिना, कोथिंबीर, मिरची, आलं, लसूण, चाट मसाला, सैंधव मीठ आणि जीरे घालून बारीक पेस्ट करून घ्यावी.

आवश्यकतेनुसार पाणी घालावे. आता ही पेस्ट एका भांड्यामध्ये घेऊन त्यामध्ये २ ग्लास थंड पाणी घालावे. वरून बुंदी घालावी.

पाणीपुरी:
पाणी पुरी साठी पुरी घेऊन त्यामध्ये मूग-बटाटा फिलिंग, शेव व कांदा घालावा.त्यामध्ये गोड पाणी आणि तिखट पाणी घालून सर्व्ह करावे.