સૌપ્રથમ કાબુલી ચણાને ધોઈને આઠ થી દસ કલાક માટે અથવા તો આખી રાત પલાળી રાખવા. પલાળેલા ચણા ને ફરી એકવાર પાણી થી ધોઈ, નીતારી લેવા. હવે તેને એક કીચન ટોવેલ પર પાથરીને કોરા કરી લેવા.

પલાળેલા ચણા ને મિક્સર જારમાં ઉમેરવા. એની સાથે ધાણા, પાર્સલે, કાંદા, લસણ અને ચણાનો લોટ ઉમેરીને બધું બરાબર વાટી લેવું. એકદમ મુલાયમ પેસ્ટ બનાવવાની જરૂર નથી.

હવે આ મિશ્રણને એક વાસણમાં લઈને તેમાં બેકિંગ પાઉડર, જીરૂનો પાઉડર, ધાણાનો પાઉડર, લાલ મરચું, મીઠું અને મરી ઉમેરી બરાબર હલાવી લેવું અને બે કલાક માટે ઢાંકીને રહેવા દેવું. આ મિશ્રણને પાંચથી છ કલાક માટે રેફ્રિજરેટરમાં પણ રાખી શકાય.

એક વાસણમાં મીડીયમ તાપ પર તેલ ગરમ કરવા મૂકવું. તેલ ગરમ થાય એટલે તેમાં એક પછી એક ફલાફલ ઉમેરીને મીડીયમ તાપ પર બ્રાઉન રંગના થાય ત્યાં સુધી તળી લેવા. આ રીતે બધા ફલાફલ તૈયાર કરી લેવા.