केळफुल एक चविष्ट पारंपरिक भाजी..केळफूल निवडताना ताजे घ्यावे.केळफुलांची भाजी, वड्या, पॅटिस , कबाब, वडे, भाकरी, पोटेंडी, बापरे किती रेसिपी आहेत एका केळफुलाच्या!बहुतेकांना भाजी पेक्षा पॅटिस,वड्या करायला जास्त आवडतात कारण त्या जास्त चमचमीत लागतात.ठराविक केळफुलाची भाजी केली जाते.सर्वच केळफुल भाजीसाठी नसतात.
केळ्याइतकेच केळफूलाचे महत्त्व आहारात भरपूर आहे. अतिशय पौष्टिक गुणधर्म असलेली भाजी. केळफुलात जीवनसत्त्व ‘क’ ‘अ’, ‘ब,’ ‘के’, फॉस्फरस, कॅल्शिअम व आयर्न भरपूर प्रमाणात आढळते. केळ्यांचा फणा ज्यातून निर्माण होतो ते केळफूल फुलासारखं दिसतच नाही. केळफुलाच्या वरची गुलाबी,majenta रंगाची जाड पानं उलगडत गेली की, आत पिवळसर फुलांचे केळ्याच्या घडासारखे घड दिसतात. केळफुलात कोलेस्टोरॉल नाही, साखर नाही, भरपूर चोथा आणि कॅल्शियम असतं. सोडियमने समृद्ध असलेल्या या केळफुलात चांगल्या प्रतीची प्रथिनं असतात, तसेच मॅग्नेशियम, आयर्न आणि कॉपरही असतं.केळफुल निवडायला किचकट. कारण, त्यातल्या प्रत्येक फुलातला कडक दांडा आणि पातळ पापुद्रा काढावा लागतो. पण, ती अतिशय पौष्टिक असल्याने जरूर खावी. चिरल्यानंतर भाजी लिंबू घातलेल्या पाण्यात घालावी,नाही तर काळी पडते. केळफुल सोलायला घेतल्यावर केळीच्या फण्याच्या आकारासारखे छोटे छोटे फणे आत दिसतात ते न मोडता तिथुन हाताने अलगद काढून घ्यायचे आणि एकेक पाकळी ऊघडुन त्यात एक वरती काळा गोल असलेला दांडा चिमटीत धरून आपल्याकडे ओढायचा कि त्याबरोबर एक छोटी transparent पाकळी सारखी बाहेर येते ते दोनीही काढुन टाकायच कारण ते चिवट असत शिजत नाही.