முதலில் மூணு உருளைக்கிழங்கு எடுத்துக்கொண்டு அடுப்பில் ஒரு குக்கர் வைத்து உருளைக்கிழங்கை போட்டு 6 விசில் வைத்து அடுப்பை அணைத்து இறக்கவும்.

விசில் அடங்கியதும் குக்கரைத் திறந்து உருளைக்கிழங்கை தோலுரித்து பிசைந்து கொண்டு அதோடு 3 ஸ்பூன் மைதா சேர்க்கவும்.

ஒரு ஸ்பூன் பால் பவுடர் சேர்த்து ஒருகைப்பிடி சிட்டிகை சமையல் சோடா சேர்த்து நன்றாக பிசைந்து 15 நிமிடம் ஊற வைக்கவும்.

குலோப் ஜாமுன் ஊறவைக்க ஜீரா தண்ணி தயார் செய்ய அடுப்பில் ஒரு பாத்திரம் வைத்து ஒரு கப் சீனி போடவும் அதோடு முக்கால் கப் தண்ணீர் ஊற்றி கரைய விடவும். 5 ஏலக்காயை பொடியாக்கி அதோடு சேர்க்கவும்.

ஒரு ஸ்பூன் கேசரி பவுடர் சேர்த்து அரை கம்பிப் பதம் வந்தவுடன் கால் மூடி எலுமிச்சைச் சாறு ஊற்றி ஜீரா தண்ணியை இறக்கவும். பின் அந்த உருளைக் கிழங்கு மாவை சிறு சிறு உருண்டைகளாக உருட்டி வைக்கவும்.

பின் அடுப்பில் ஒரு கடாயை வைத்து எண்ணெய் ஊற்றி காய்ந்தவுடன் மிதமான சூட்டில் ஒன்றிரண்டாக பொன் நிறமாக பொரித்தெடுக்கவும்.

எடுத்த உருண்டைகளை சீனி பாகில் போடவும். ஒரு அரை மணி நேரம் கழித்து ஒரு பவுலில் பரிமாறவும். சுவையான உருளைக்கிழங்கு குலோப் ஜாமூன் ரெடி.🌷🌷🌷