अंडी धुवून, उकडून घ्यावी. अंडी उकडताना त्यात चिमुटभर मीठ घालावे म्हणजे अंडी फुटत नाहीत आणि लवकर उकडतात. उकडलेल्या अंड्याची साले काढून त्या अंड्यांना उभ्या चिरा पाडाव्या म्हणजे अंड्याच्या आत पर्यंत मीठ मसाले लागतात.

पॅनमधे जरासं तेल घालून त्यात थोडे तिखट, मीठ, हळद घालून मग अंडी घालून खरपूस परतून घ्यावे. यामुळे अंडी खूप टेस्टी लागतात.

कढईत तेल घालून त्यात बारीक चिरलेला कांदा घालून ब्राऊन होईपर्यंत परतून त्यात तिखट पूड हळद मीठ धणे-जीरे पावडर आणि मालवणी मसाला घालून मिक्स करावे. आणि थोडी बारीक चिरलेली कोथिंबीर घालून परतावे. यामुळे करी चवदार चविष्ट बनते.

मिक्सरच्या भांड्यात टोमॅटोच्या फोडी, आणि आलं लसूण घालून पाणी न वापरता प्युरी करुन घ्यावी. ती टोमॅटो प्युरी कांद्यावर घालून चांगले परतावी.

पॅनमधे जरासं तेल घालून त्यात २ टीस्पून बेसन पीठ घालून खमंग भाजून घ्यावे. आणि ते टोमॅटोच्या ग्रेव्ही मधे घालून चांगले ढवळावे आणि एक वाफ‌ काढावी. यामुळे ग्रेव्ही दाट होते आणि जर टोमॅटो आंबट असेल तर ग्रेव्ही जास्त आंबट लागत नाही.

ग्रेव्ही मधे थोडे पाणी घालून जरा उकळी आणावी. मग त्यात उकडून फ्राय केलेली अंडी घालावी परत एकदा जरासे उकळावे. यामुळे अंड्यामधे ग्रेव्हीची छान चव उतरते.