સૌ પ્રથમ એક મોટા વાસણમાં મેંદો ઉમેરી તેમાં રવો અને ઘી ઉમેરી બરાબર મિક્સ કરી લો.

હવે આમાં હળદર પાઉડર, બેકિંગ પાઉડર, અધકચરું વાટેલું જીરું, અધકચરાં વાટેલા કાળા મરી, અજમો અને નમક ઉમેરી બરાબર મિક્સ કરી લો. લોટ ના મિશ્રણ ને હાથ માં લેતા મુઠ્ઠી પડે એવું ઘી નું મોણ લેવાનું છે.

હવે આમાં ઠંડું પાણી થોડું થોડું ઉમેરતા જવું અને કઠણ લોટ બાંધી લેવો. લોટને બે થી ત્રણ મિનિટ માટે મસળવો. ઢાંકીને 15 મિનિટ માટે રહેવા દેવો.

હવે લોટમાંથી એકસરખા 25 ભાગ કરી લેવા. હવે એક ભાગ લઈને તેમાંથી જાડી પુરી વણી ચપ્પુ ની મદદ થી એમાં કાપા કરી લેવા. આ રીતે પાંચ છ પુરી એક સાથે તૈયાર કરી લેવી.

ત્યાર બાદ તેલ ને મીડીયમ તાપે ગરમ કરવું. હવે તેમાં તૈયાર કરેલી પુરી ઉમેરીને મીડીયમ તાપ પર એક મિનિટ માટે તળવી. ત્યારબાદ ગેસ ધીમો કરીને પુરી હલકા ગોલ્ડન રંગની થાય ત્યાં સુધી તળવી. આ પુરી તળાતી હોય ત્યારે બીજી પુરી વણી લેવી કેમ કે પુરી તળાતા ઘણી વાર લાગે છે. પુરી ને ધીમા થી મીડીયમ તાપના ગેસ ની આંચ પર તળવી નહિતર ક્રિસ્પી બનશે નહીં.

હવે આપણી એકદમ ખસ્તા અને ક્રિસ્પી એવી મેંદા રવાની ફરસી પૂરી તૈયાર છે સર્વ કરવા માટે. ફરસી પુરી ને ચા કે કોફી સાથે સર્વ કરવી.