एका मोठ्या भांड्यात धुतलेले तांदूळ घालून त्यात पाणी घातले (२ वाट्या तांदळा साठी साडेतीन वाट्या पाणी घातले), मग त्यात जीरे, लवंग, दालचिनी, स्टारफूल, मीरे, मीठ आणि तूप घालून मिक्स करुन कुकरममधे ठेवले आणि एक शिट्टी काढून तो भात एका मोठ्या प्लेटमधे काढून फॅनखाली गार करायला ठेवला.

फ्लावर, गाजर आणि बटाट्याच्या फोडी करुन ठेवल्या,‌‌‌ वाटाणे सोलून घेतले. मग ते सर्व पाणी घालून भाज्य थोडा वेळ वाफवून घेतल्या.

एका पॅनमधे तेल घालून त्यात काजू तळून घेतले. आणि त्यातच उभा बारीक चिरलेला कांदा पण बाऊन होईपर्यंत परतून घेतला.

नंतर एका कढईमधे तेल घालून त्यात बारीक चिरलेला कांदा आणि टोमॅटो परतून त्यात तिखट पूड, हळद, धणे-जीरे पूड, मीठ, गरम मसाला पावडर, आणि बिर्याणी मसाला घालून चांगले परतून त्यात दही, चाट मसाला आणि १ टीस्पून बिर्याणी इसेन्स घालून चांगले परतून घेतले. मग त्यात कोथिंबीर आणि पुदिन्याची पाने हाताने तोडून घातली.

दही घातलेला मसाला चांगला परतून घेतला. आणि त्यात वाफवलेल्या भाज्या घालून अलगद परतले.

नंतर एका मोठ्या कढईमधे तूप घालून त्यात अगदी खाली शिजवून गार केलेला मोकळा भात घातला.‌ त्यावर परतलेल्या भाज्या घालून त्यावर २ टीस्पून तूप घालून परतले. मग त्यावर तळलेले काजू, परतलेला कांदा, कोथिंबीर आणि पुदिन्याची पाने आणि बिर्याणी इसेन्स, गरम मसाला घातला. आणि त्यावर परत शिजवून गार केलेला मोकळा भातचा लेअर लावला.

भातावर भिजवून ठेवलेले केशराचे पाणी घातले. आणि परत त्यावर तळलेले काजू, तळलेला कांदा, कोथिंबीर, पुदिन्याची पाने आणि २ टीस्पून तूप घालून त्यावर झाकण ठेवले. मग गॅसवर तवा ठेवून त्यावर बिर्याणीची कढई ठेवून वाफ काढली.

एका वाटी मधे मैदा घालून त्यात मीठ आणि पाणी घालून जरा सैलसर मळून घेतले. आणि पोलपाटावर मोठी पोळी लाटून घेतली.

एका फ्राइंग पॅनमधे तूप लावून त्यावर लाटलेल्या पोळीचा त्रिकोण करुन ठेवला. म्हणजे पोळी तव्यामधे उघडताना चिकटणार नाही. मग पोळी पूर्णपणे उघडून त्यात बिर्याणी भरली.

बिर्याणी भरल्यानंतर बाजूच्या पोळीने झाकून बंद करावे. आणि त्यावर दुसरा पॅन झाकून ठेवावा. मग खालची बाजू खरपूस भाजली की मग वरची बाजू अलगद दुसऱ्या पॅधमधे घालून ती बाजू पण आता शेकवून घ्यावी. अशा तर्हेने बिर्याणीला पोळीचा परदा लावून बंद करुन घ्यावा.

छान खरपूस भाजून घेतलेली परदा बिर्याणी एका प्लेटमधे अलगद काढून घ्यावी. आणि सुरीच्या सहाय्याने बंद असलेल्या बिर्याणीचा एक एक त्रिकोण कापून पूर्ण बिर्याणी उघडावी.

बिर्याणीचा परदा एक एक त्रिकोणात उघडत असतानाच खूप सुंदर दिसते आणि बिर्याणीचा मस्त सुगंध दरवळायला लागतो. मग एका वाटी मधे दही घालून त्यात तिखट पूड, मीठ, चाट मसाला आणि पुदिन्याची चटणी घालून दुसऱ्या बाऊलमधे उभा चिरलेला कांदा, टोमॅटो आणि लिंबाची फोड ठेवून मस्त खमंग अशी परदा/पोटली बिर्याणी सर्व्ह करावी.