मोदकाच्या पारी साठी उकड तयार करायला घेऊया आता.. प्रथम 2 भांडी पाणी जाड बुडाच्या पातेल्यात गरम करायला ठेवायचे. त्यात एक चमचा तूप टाकायचे.. पाणी छान उकळले की गॅस बारीक करून त्यात 2 भांडी मोदक पिठी घालून सगळे पाणी पिठीत मुरले की गॅस बंद करून 5 मिनिटे पातेले झाकून ठेवायचे.

मग ही उकड परती मध्ये काढून घेऊन पाण्याचा हात लावून चांगली मळून घ्यायची.. गरम असतानाच.. हाताला चटके बसतात.. पण त्याशिवाय मोदक कसे मिळणार खायला.. म्हंटले आहेच ना.. आधी हाताला चटके.. तेव्हा मिळती मोदक.. 😀😀

छान मळून झाली की त्याचे मध्यम गोळे करून घ्यायचे आणि झाकून ठेवायचे.. आता एक गोळा घ्यायचा आणि त्याची वाटी तयार करायची. त्याला बोटांनी चिमटे देऊन कळ्या करायच्या.. त्यात सारण भरून हलक्या हाताने वरतून एकत्र करून मोदकाचा आकार तयार करायचा..

माझा पहिलाच मोदक एकदम सुबक नाही झाला. पण नंतर चे चांगले झाले. वर सांगितल्या प्रमाणे सगळे मोदक तयार करून ओल्या फडक्यात झाकून ठेवले.

मग गॅस वर कूकर ठेऊन त्यात कूकर चे भांडे ठेवले त्यात स्टील ची चाळणी ठेवली. त्याला थोडे तेल लावून घेतले. मग त्यात हे मोदक अगदी हलक्या हाताने जेवढे राहतील तेवढेच ठेवले. कुकरची शिटी काढून ठेवली. आणि मध्यम गॅस वर 15 ते 20 मिनिटे चांगले वाफवून घेतले. आणि मग पंख्याखाली गार करायला ठेवले. राहीलेले मोदक पण असेच वाफवून घ्यायचे.