1)नारळ खोवून ठेवावा.कोथिंबीर, लसूणपात चिरावी.आलं-मिरची पेस्ट करावी.लिंबांचा रस काढून ठेवावा.आलं-लसूण पेस्ट करावी.
2)वरील मसाल्याचे सर्व साहित्य तयार ठेवावे-धणेपूड,जीरे पूड,तिखट,गरम मसाला,ओवा,पीठीसाखर, हळद,मीठ,तीळ.
3)हरभरे,मटार,पावटा,तूर यांचे दाणे सोलून घ्यावेत.सुरती पापडी,वालवर शेंगा सोलाव्यात.

कंदभाज्या चिरणे:-
उंधियोमध्ये सुरण,रताळे,बटाटे,कोनफळ या कंदभाज्यांची सुरेख चव लागते.या सगळ्याच्या मोठ्या फोडी कराव्यात.कारण शिजून आकार लहान होतो.यातले कोनफळ चिरायला थोडे चिकट असते.पण तो चिकटपणा भाजीत रहात नाही.वांगी नेहमीप्रमाणे मध्ये चीर देऊन चिरावीत. केळी मध्यम आकाराची चिरावीत.

बटाटे,सुरण,रताळी,कोनफळ यांची साले काढून मोठ्या फोडी कराव्यात.या सर्व कंदभाज्या चिरल्यावर आपल्याला एकेक करून तळायच्या आहेत.तळतानाच त्या बऱ्यापैकी शिजतात.त्यासाठी मेथीचे मुटके तळून झाल्यावरचे उरलेले तेल वापरायचे आहे.तोच मेथीचा स्वाद या सर्व भाज्यांमध्ये उतरतो.

एकीकडे सोललेली सुरती पापडी,वालाच्या शेंगा व मटार,तूर,पावटा,हरभरे याचे दाणे यांना थोडेसे तेल व खायचा सोडा लावून थोडा वेळ अगोदरच ठेवावे.यामुळे पापडी व दाणे व्यवस्थित शिजतात.रंग तसाच रहातो.

आता मेथीचा मुठीया करुन घ्यायचा आहे.यासाठी कोवळी मेथी निवडून, धुवून, बारीक चिरावी.मेथीचा मुठीया या विभागात दिल्याप्रमाणे कणिक,हरभरा डाळीचे पीठ,तेलाचे मोहन,तिखट,मीठ,ओवा,तीळ,चिरलेली ताजी लसूणपात, धणेजीरे पूड,आलंमिरची पेस्ट,हळद,हिंग,पीठीसाखर,किंचीत सोडा व 2चमचे लिंबाचा रस घालून मुठीयासाठी पीठ भिजवावे.पाणी जास्त लागत नाही.मुठीयासाठी घट्टच पीठ असावे.

छोटे छोटे गोल/लांबट मुठीया वळून ठेवावेत.कढईत तेल तापत ठेवावे.तेल तापले की त्यात सोनेरी खरपूस रंगावर हे मुटके/मुठीया तळून घ्यावेत.

आता मुठीया तळलेल्या तेलात सर्व कंदभाज्या क्रमाक्रमाने तळून घ्याव्यात.भाज्या तळल्यामुळे खरपूसपणा येतो.तसेच तेलात थोड्या शिजतातही.त्यामुळे नंतरचा शिजवण्याचा वेळ कमी होतो.आणि भाज्या overcookही होत नाहीत.चवही मस्त लागते.

*एकीकडे सुरतीपापडी,वालशेंगा आणि सर्व प्रकारचे दाणे मायक्रोवेव्हमध्ये 10-12मिनिटे 80%पॉवरवर उकडून घ्याव्यात.किंवा कुकरमध्ये बारीक गँसवर 12-15मिनिटे शिट्टी न लावता उकडून घ्याव्यात.

भाज्यांना मसाला लावण्यासाठी:-
नारळ चव भरपूर घातला की उंधियो ओलसर असा खाताना छान लागतो.नारळाचा चव,आलं-मिरची पेस्ट,कोथिंबीर याची पेस्ट करुन घ्यावी.यात चवीनुसार मीठ घालावे.व वरील मसाला साहित्यातील धणेजीरे पूड,गरम मसाला,तिखट असे एकत्र करुन मसाला तयार करावा.व नंतर भाज्यांना तळून झाल्यावर लावून थोडावेळ मुरु द्यावा.उरलेला मसाला भाजी पूर्ण शिजवताना त्यातील लेअर्समध्ये घालावा.

आता मोठ्या पातेल्यात भाज्या तळून उरलेले जे तेल असेल ते सगळे घालावे.तेल जास्त होत नाही.ओवा,हळद,आलं-लसूण पेस्ट घालून फोडणी करुन भाज्यांचे शिजण्यास लागणाऱ्या वेळेनुसार थर करायचे आहेत.प्रथम फोडणीवर मायक्रोवेव्ह मध्ये उकडलेल्या पापडी शेंगा,सर्व दाणे घालावेत.थोडे परतावे.यावर ओला मसाला,मीठ व घालावे.बटाटे,सुरण,कोनफळ,रताळी ह्या मसाला लावलेल्या भाज्या घालाव्यात.त्याही परताव्यात.पुन्हा ओल्या मसाल्याचे वाटण,मीठ व पाणी घालावे.यावर तळलेल्या केळाच्या फोडींवर मसाला घालून भाजी तळापासून हलवावी.

अगदी नेहमी वापरातले साधेसेच मसाले असले तरी यातली ओव्याची चव फार सुंदर लागते,तसेच ओल्या नारळामुळे उंधियो कोरडा होत नाही.भाज्या तळल्यामुळे लवकर शिजतात.त्यामुळे मोठ्या प्रमाणात जरी करायचा असला तरी चव मात्र तीच अफलातून लागते.
आता उंधियो तयार आहे.....घरभर भाज्या,मुठीया,मसाले यांचा मस्त सुगंध येतो आहे.सगळ्यांना भूकही लागलीये...खवैय्ये दर्दी आहेत.गरमागरम उंधियो फुलके किंवा पोळीबरोबर सर्व्ह करावा.सोबत तीळाची चटणी,कढी,खिचडी आणि गाजरहलवा...चला तर.....या....उंधियोचा आस्वाद घ्यायला!🤗🤗😋👍👍