સૌપ્રથમ મેથીના અને રાયના કુરિયા ને ધીમા તાપે શેકી લેવા. મીઠું ને પણ ધીમા તાપે રંગ બદલાય નહીં એ રીતે શેકી લેવું. આમ કરવાથી બધી વસ્તુઓનો ભેજ નીકળી જાય છે અને મસાલો લાંબા સમય સુધી સારો રહે છે. મેથીના અને રાયના કુરિયા એકદમ ઠંડા થાય એટલે એને મીક્સરમાં એક-બે વાર પલ્સ કરી લેવા. વધારે વટાઈ ના જાય એનું ખાસ ધ્યાન રાખવું.

તેલ ધુમાડા નીકળે એટલું ગરમ કરીને હૂંફાળું થાય ત્યાં સુધી ઠંડુ કરી લેવું.

હવે એક વાસણમાં બહાર મેથીના કુરિયા ગોળાકારમાં ગોઠવવા ત્યારબાદ એની અંદર રાઈના કુરિયા ની લાઈન કરવી. પછી વરિયાળી મૂકી વચ્ચે હિંગ મૂકવી. હવે એની ઉપર હુંફાળું તેલ ઉમેરીને ઢાંકણ ઢાંકી દેવું. ઢાંકણ ને પાંચ મિનિટ ઢાંકેલું રાખવું જેથી કરીને હિંગ ની સુગંધ મસાલામાં બેસી જાય. હવે તેમાં હળદર અને મીઠું ઉમેરીને બધું બરાબર હલાવી લેવું. જ્યારે મસાલો એકદમ ઠંડો થઈ જાય ત્યારે તેમાં મરચું ઉમેરી બધું ભેગું કરી લેવું.

મરચું મસાલો ઠંડો થયા બાદ જ ઉમેરવું જેથી કરીને મસાલાનો રંગ આખું વર્ષ એકદમ લાલ રહે. મસાલામાં કોઈ પણ પ્રકારની સ્ટ્રોંગ હિંગ વાપરી શકાય પરંતુ બજારમાં મળતા મસાલા જેવો મસાલો બનાવવા માટે રસની હિંગ વાપરવાથી ખુબ જ સરસ સુગંધ આવે છે.

અથાણાં ના મસાલાને એરટાઇટ બરણીમાં એક વર્ષ સુધી સાચવી શકાય છે. આ મસાલાનો ઉપયોગ કરીને કેરી ના અલગ અલગ પ્રકારના અથાણા બનાવી શકાય છે.