फ्लॉवर, फरसबी, गाजर आणि मशरूम गरम पाण्यात जरा उकळून/ ब्लांच करुन घेणे. कांदा आणि सिमला मिरचीचे मोठे तुकडे करून ते थोड्या तेलावर फ्राय करून घ्यावे. सगळ्या भाज्या फ्राय करून पण घेऊ शकतो.

कोल्हापूरी मसाला बनवण्यासाठी पॅममधे थोड्या तेलावर वरील खडे मसाले, ओलं आणि सुकं खोबरं भाजून घेणे, जास्त ब्राऊन होईपर्यंत भाजायचे नाही.

पाण्यात भिजवलेले काजू आणि टोमॅटोच्या फोडी यांची मिक्सर मधून बारीक प्युरी करून घ्यावी.

कढईत तेल घालून त्यात फोडणीसाठी जीरे, सुक्या मिरच्या, तमालपत्र घालून परतून त्यात बारीक चिरलेला कांदा घालून परतावे. मग त्यात आलं लसूण पेस्ट घालून परतून, हळद आणि काश्मीरी तिखट पूड घालून परतावे.

परतलेल्या कांद्यावर काजू टोमॅटोची प्युरी घालून परतून त्यात ओला वाटाणा घालून मिक्स करावा. मग त्यात वाटलेल्या खोबर्यांचा कोल्हापूरी वाटण मसाला घालून परतावे.

कोल्हापूरी वाटण मसाला चांगला परतून त्यात ब्लांच आणि परतलेल्या भाज्या घालून मिक्स करावे. मग कसूरी मेथी, गरम मसाला पावडर आणि बारीक चिरलेली कोथिंबीर घालून मिक्स करावे.

मग त्यात पनीरचा चुरा किंवा पनीर क्युब घालून मिक्स करावे. आणि वरुन परत थोडा पनीरचा चुरा/ क्रश पनीर सजावटीसाठी घालावे. मस्त चमचमीत वेज कोल्हापुरी भाजी तयार आहे.