એક મોટા વાસણમાં છીણેલું પનીર, કાંદા, કેપ્સિકમ અને મકાઈ ને મિક્સ કરવા. હવે તેમાં લાલ મરચું, ગરમ મસાલો અને મીઠું ઉમેરીને બધું બરાબર હલાવી લેવું. વઘારીયા માં તેલ ગરમ થાય એટલે તેમાં આદુ અને લીલા મરચાની પેસ્ટ ઉમેરીને એક મિનીટ માટે સાંતળવી. ત્યારબાદ તેને પનીરના મિશ્રણમાંથી ઉમેરી બધું બરાબર હલાવી લેવું.

મેંદો અને પાણી ને ભેગા કરી બરાબર હલાવી લઈ ને સમોસા ની કિનારી ચોંટાડવા માટે ની પેસ્ટ બનાવી લેવી. હવે એક સમોસા પટ્ટી લઈ તેમાં 1 ટેબલસ્પૂન ફીલિંગ ઉમેરીને એને વાળીને સમોસાનો આકાર આપવો. મેંદા ની પેસ્ટ વડે કિનારીઓ ચોંટાડી લેવી. આ રીતે બધા સમોસા તૈયાર કરી લેવા. સમોસા ને કપડા વડે ઢાંકીને રાખવા અને સમોસાની પટ્ટી ને પણ ઢાંકીને રાખવી જેથી કરીને સુકાઈ ના જાય. ભરેલા સમોસા ને રેફ્રિજરેટરમાં સ્ટોર કરીને બીજા દિવસે પણ તળી શકાય.

એક કઢાઈમાં તેલ ગરમ થાય એટલે તેમાં મીડીયમ તાપ પર સમોસા ને ગોલ્ડન કલર ના તળી લેવા. આ રીતે બધા સમોસા તળી ને તૈયાર કરવા.

ગરમા ગરમ સમોસાને ટોમેટો સોસ કે પસંદગી મુજબની ચટણી સાથે સર્વ કરવા.