સૌપ્રથમ વાલને ત્રણથી ચાર વાર પાણીથી ધોઈને છ થી આઠ કલાક માટે પલાળી રાખવા. હવે પલાળેલું પાણી નિતારી લઈને વાલ ને પ્રેશર કુકરમાં ઉમેરી એમાં પાણી અને મીઠું ઉમેરીને બાફી લેવા.

હવે એક વાસણમાં કાશ્મીરી લાલ મરચું, લાલ મરચું, ધાણાજીરું, હળદર, આમચૂર પાવડર અને પાણી ભેગું કરીને મસાલા પેસ્ટ બનાવી લેવી. એક પોટમાં તેલ ગરમ થાય એટલે તેમાં જીરું ઉમેરી જીરુંનો રંગ બદલાય એટલે તેમાં અજમા, હિંગ, લાલ સૂકું મરચું અને તમાલપત્ર ઉમેરવું. હવે તેમાં એક ટેબલસ્પૂન ચણાનો લોટ ઉમેરીને બરાબર શેકી લેવો. ત્યારબાદ તેમાં આદુ મરચાં અને લસણ ઉમેરીને એક મિનિટ માટે મીડીયમ તાપ પર સાંતળવું. હવે તેમાં તૈયાર કરેલી મસાલા પેસ્ટ ઉમેરીને તેલ છૂટું પડે ત્યાં સુધી સાંતળવું.

હવે તેમાં ટામેટાની પ્યુરી અને મીઠું ઉમેરીને બરાબર હલાવી લેવું અને મીડીયમ તાપ પર તેલ છૂટું પડે ત્યાં સુધી પકાવવું. ત્યારબાદ તેમાં બાફેલા વાલ પાણીની સાથે જ ઉમેરી દેવા અને ગરમ મસાલો, આમલીનો પલ્પ અને ગોળ ઉમેરીને બરાબર હલાવી લેવું.

મીડીયમ તાપ પર 10 થી 12 મિનિટ માટે પકાવીને લીલા ધાણા ઉમેરીને ગેસ બંધ કરી દેવો. વઘાર માટે તેલ ગરમ કરી એની અંદર કાશ્મીરી લાલ મરચું ઉમેરીને ગેસ બંધ કરી દેવો. તૈયાર કરેલો વઘાર વાલના શાક ઉપર ઉમેરવાથી એનો સ્વાદ અને સુગંધ ખૂબ જ સરસ આવે છે.