#BFR च्या पावाची रेसिपी हॉस्टेल मधली एक खूप गोड आठवण आहे. आमची मेसवाली आंटी जेवण बरं देत असली तरी नाष्टा एकच असायचा.. सुसला! 😉 मग रोज सुसला नाही आवडायचा. रविवारी कधी मार्केट मध्ये गेल्यानंतर फ्रेश पाव मिळायचे. रोजच पावा पासून काही पदार्थ बनवायला जमायचं नाही. कधी चहा बरोबर खाल्ला जायचा तर कधी कॉफी बरोबर! तर एकदा शेंगदाण्याच्या चटणीबरोबर या पावाचा केलेला प्रयोग खूपच लक्षात आहे. त्यातच फक्त शेंगदाणा चटणी ऐवजी पीनट बटर वापरून मी स्प्रेड तयार केले आणि एक झकास नाविन्यपूर्ण रेसिपी निर्माण झाली.
पीनट बटर हा आरोग्याचा खजिनाच जणू! ब्रेकफास्ट मध्ये घेतल्यास दिवसभरासाठीची एनर्जी शरीरात पेरली जाते. तसंच, आयर्न आणि हिमोग्लोबिनची पातळीही इन्स्टंट वाढवते. त्यामुळे लहानांपासून मोठ्यांपर्यंत हे सगळ्यांनी खाल्लं पाहिजे. पण पीनट बटर हे गोडसर असते. त्याची टेस्ट डेव्हलप व्हायला आपल्या भारतीय जिभेला थोडा वेळच लागतो. ते सहजासहजी कुणी खाऊ शकत नाही. म्हणूनच त्याला ट्विस्ट देऊन, त्याच्यामध्ये आपले भारतीय मसाले घालून त्यापासून निर्माण झालेली ही रेसिपी सुपरहिट आहे. तुम्हांलाही नक्कीच आवडेल..