સૌપ્રથમ એક કડાઈમાં બે ચમચી બટર લો ત્યારબાદ સમારેલી ડુંગળી ના કટકા બટરમાં નાંખી અને બ્રાઉન રંગના થાય ત્યાં સુધી સાંતળો.

ડુંગળી થોડી સંતળાઈ જાય ત્યારબાદ તેમાં લસણની કળી, આદુ ના કટકા, સમારેલા લીલા મરચાં, અને સમારેલા ટામેટા ના ટુકડા નાખો. ટામેટા થોડાક ગળી જાય ત્યાર બાદ ધોયેલી પાલકના પાન નાખીને બરાબર હલાવો, બે મિનિટ પછી તેમાં બાફેલા છોલે ચણા તથા બાફેલી મગની દાળ ઉમેરો, બધી વસ્તુ બરાબર હલાવીને પાંચ મિનિટ માટે કઢાઈને ઢાંકી દો.

પાંચ મિનિટ પછી તેમાં મીઠું, લાલ મરચાનો પાઉડર, ધાણાજીરું, હળદર, સંચળ, ચાટ મસાલો તથા લીંબુનો રસ ઉમેરો. બરાબર હલાવી ફરી તેને બે મિનિટ માટે ઢાંકી દો. ગેસ બંધ કરી બધું મિશ્રણ થોડીવાર સુધી ઠંડુ પડવા દો. ઠંડા પડી ગયેલા મિશ્રણને મિક્સરમાં ક્રશ કરી લો, થોડું થોડું પાણી ઉમેરી અને મિક્સરમાં ફેરવી પાતળી પેસ્ટ તૈયાર કરો ત્યારબાદ આ પેસ્ટ ને વાસણમાં ગાળી લો, ફરી કઢાઈમાં એક ચમચી બટર મૂકી અને તૈયાર થયેલી પેસ્ટ ગરમ કરો ત્રણ મિનિટ સુધી આ પેસ્ટને ઘટ્ટ થવા દો.

એક નાની કડાઈમાં તેલ ગરમ કરીને મનપસંદ આકારમાં બ્રેડના ટુકડા કાપી અને તળી લો. તૈયાર કરેલા સૂપને બાઉલમાં કે કપમાં કાઢી છીણેલું ચીઝ, ક્રીમ તથા બ્રેડના ટુકડા સાથે ગાર્નિશ કરીને ઈચ્છા મુજબ જુદી જુદી રીતે સર્વ કરો.