મુઠીયા માટે ની બધી સામગ્રી એક બોલ માં સારી રીતે મિક્સ કરી લો (તળવા માટે તેલ ને છોડીને) અને હલકા હાથે મુઠીયા બનાવીને તેલ માં તળીને અલગ મૂકી દો.

એક મિકસર જાર માં, લીલું નારિયળ, લીલું લસણ, લીલું મરચું, આદુ, લીલા ધાણા, લીંબુ નો રસ અને થોડું પાણી નાખી ને, પેસ્ટ બનાવી લો. હવે એક બોલ માં મેથી, બનાવેલી પેસ્ટ, હળદર પાઉડર, લાલ મરચું પાઉડર, ધાણાજીરું પાઉડર, ગરમ મસાલો, મીઠું અને સાકર લઈને સારી રીતે મિક્સ કરી લો. ઊંધિયા માટે નો મસાલો તૈયાર થઈ ગયો.

હવે બધી શાક ભાજી સાફ કરીને કાપી લો. કેળા ના મોટા ટુકડા માં કાપીને, વચ્ચે થી એક ચિરો મારીને બનાવેલો મસાલો ભરી લો. રીંગણ પણ એવી રીતે એક ચિરો મારીને, મસાલો ભરીને મૂકી દો. હવે બાકી ની બધી શાક ભાજી મસાલા માં નાખી ને મિક્સ કરી લો. મુઠીયા મસાલા માં નાખવાના નહિ.

હવે એક મોટા પ્રેશર કૂકર માં તેલ ગરમ કરવા મૂકો. તેલ ગરમ થાય એટલે, અજમો અને હિંગ નાખો. હવે મસાલા માં મિક્સ કરેલી બધી શાક ભાજી, મસાલા સાથે નાખી ને સારી રીતે મિક્સ કરી લો. એક નાની વાટકી માં પાણી લઈને, તેમાં, મીઠું, સાકર, હળદર, લાલ મરચું અને ગરમ મસાલો નાખીને સારી રીતે મિક્સ કરીને, કૂકર માં નાખી દો. બધું સારી રીતે મિક્સ કરો. હવે મસાલા થી ભરેલા કેળા અને રીંગણ પણ કૂકર માં મૂકી દો. ઢાંકણ બંધ કરીને બે સિટી વગાડીને ગેસ બંધ કરી દો.

હવે એક મોટા કઢાઈ માં તેલ ગરમ કરવા મુકો. તેલ ગરમ થાય એટલે તેમાં અજમો અને તલ નાખો. ત્યાર બાદ તેમાં, કૂકર માં બનાવેલું શાક ભાજી નાખી ને સારી રીતે મિક્સ કરી દો. એક મિનિટ માટે પકાવીને એમાં બનાવેલા મુઠીયા નાખીને ફરી એક વખત સારી રીતે મિક્સ કરી ને ગેસ બંધ કરી દો.