सर्वात प्रथम एक लीटर मधील १/२ लीटर दूध एका भांड्यात गरम करत ठेवा. उरलेले १/२ लीटर दूध एका जाड बुडाच्या पॅनमध्ये गरम करायला ठेवा. हे दूध बासुंदी सारखे आटवायचे आहे. भांड्यामधले दूध चांगले गरम झाले कि त्यामध्ये लिंबाचा रस टाकून गॅस बंद करा आणि दूध ढवळत रहा. आता चमच्याने एकाच दिशेने हलवत रहा. दूध नासण्याची प्रक्रिया चालू होते आणि गोळा तयार होऊन दूधापासून पनीर वेगळे झालेले दिसेल.

मग एका चाळणीवर पांढरा सुती कपडा ओला करून ठेवा आणि त्यावर दूध ओता. सगळे पाणी पिळून काढून टाका. गाळलेले पनीर फडक्यात असतानाच गार पाण्याने थोडे धूवून घ्यावे म्हणजे लिंबाची आंबट चव आणि वास निघून जाईलकपड्यावरचे पनीर एका बाऊलमध्ये काढून घ्या. त्यात गुलकंद मिक्स करा.

पॅनमधले दूध आटले कि त्यामध्ये साखर टाकून ढवळा. १/२ कप साखरे ऐवजी १ कप पिठीसाखर टाकली तरीही चालेल. दूधातली साखर विरघळली कि गुलकंद आणि पनीरचे मिश्रण टाकून ढवळा.

केशर इलायची सिरप आणि वेलची पूड टाकून ढवळा. मिश्रण एकदम कोरडे करू नका. कलाकंद खाताना थोडे ओलसर लागायला हवे. मिश्रण घट्ट होत आले की एका तूप लावलेल्या टिनमध्ये काढा. वरती काजूबदामचे काप टाका आणि दोन तासांसाठी कलाकंद फ्रिजमध्ये सेट करायला ठेवा. गार झाल्यावर वड्या पाडून घ्या.