एका परातीमध्ये मैदा चाळून घ्या. त्यात बेसन घाला. ओवा व चवीनुसार मीठ घालून मिक्स करून घ्या. 2 टेबलस्पून तेल गरम करून या पिठामध्ये घाला. (तेलाचे मोहन गरम हवे.) आता यात थोडे पाणी घालून घट्ट गोळा मळून घ्या.हा गोळा भिजण्यासाठी 15-20 मिनिटे बाजूला ठेवून द्या.

आता बाकरवडी चे सारण बनवण्यासाठी एक पॅन गरम करून त्यात धने, जिरे, बडीशोप घाला. 1-2 मिनिटे परतून घ्या.आता यात खसखस आणि तीळ घालून 1 मिनिटे परतून घ्या. हा मसाला बाजूला काढून घ्या व त्याच पॅन मध्ये सुके खोबरे भाजून घ्या.

आता हे सारण थोडं थंड झाले कि मिक्सर च्या भांड्यात काढून त्यात हळद लाल मिरची पावडर गरम मसाला घाला. मिक्सर 2 मिनिटे वाटून घ्या.

आता यात चवीनुसार मीठ आणि साखर घाला. पुन्हा एक मिनिट मिक्सर वर वाटून घ्या.सारण तयार आहे.

आता मळलेल्या पिठाची पोळी लाटून घ्या. ही पोळी मध्यभागी पातळ व कडेने जाड अशी लाटावी म्हणजे बाकरवडी आतून कच्ची राहणार नाही. आता त्या पोळी वर चिंचेची चटणी लावून घ्या. त्यावर तयार केलेला मसाला पसरून घ्या. त्यावर बारीक शेव पसरून घ्या.

आता या पोळीची घट्ट गुंडाळी करून घ्या. व एक एक इंचाचे काप करून घ्या. हे काप थोडेसे दाबून घ्या. बाकरवडी तयार आहे. गरम तेलामध्ये सोनेरी रंगावर कुरकुरीत होईपर्यंत तळून घ्या.