चिकन मुरवण्यासाठी : लसूण, आलं, पुदिना मिरच्या यांची एकत्रित पेस्ट केली. चिकन ला लाल तिखट मसाला, हळद, वरील बनवलेली पेस्ट आणि मीठ चोपडून लिंबाचा रस पिळला. हे चिकन चांगलं २-३ तास या मसाल्यात मुरवत ठेवलं.

कोडी वेपुडू मसाला : कढईत तेल गरम करून सर्व खडे मसाले घालून तेलात परतून घ्यायचे. मसाल्यांचा सुगंध सुटला की खोबरं घालून परतायचं आणि गॅस बंद करून थंड व्हायला द्यायचं. थंड झाल्यावर मिक्सर ला मसाले बारीक वाटून घ्यायचे. कोडी वेपुडू मसाला तयार.

कोडी वेपुडू किंवा चिकन फ्राय : कढईत ३-४ चमचे तेल गरम करून त्यात कढीपत्त्याची पाने आणि पांढरे तीळ घालून तडतडू द्यायचे. चिरलेला कांदा घालून पारदर्शक / गुलाबीसर होईपर्यंत तळायचा. मिक्सर मध्ये वाटलेला कोडी वेपुडू मसाला घालायचा आणि तेल सुटेपर्यंत परतायचा. मीठ टाकून ढवळून घ्यायचं. मीठ बेताचंच टाकायचं कारण याआधी सगळ्यात मीठ वापरलेलं आहे.

आता यात शिजवलेलं चिकन घालून (मसाला चिकन मध्ये मुरेपर्यंत) झाकण ठेवून शिजवायचं. झाकणावर पाणी ठेवायचं. मध्ये मध्ये ढवळत राहायचं जेणेकरून मसाला बुडाला लागू नये. साधारण १५ मिनिटांनी मसाला चिकन ला व्यवस्थित लागून चिकन फ्राय झालेलं असेल. एकदा मीठ बरोबर असल्याचं चाखूनघ्यायचं आणि गॅस बंद करून ठेवायचा. पाच मिनिटात आतल्या आत वाफेवर कोडी वेपुडू मसाला मुरून मस्त चिकन फ्राय खायला तयार झालेलं असेल. 🍗🐔
~ सुप्रिया घुडे