முதலில் பிரஷர் குக்கரில் மட்டன் துண்டுகள் மற்றும் மஞ்சள்தூள், உப்பு,சேர்த்து தேவையான அளவு தண்ணீர் ஊற்றி, மிதமான சூட்டில் 4 - 5 விசில் வரும் வரை வேக வைக்கவும். பாஸ்மதி அரிசியை 10 நிமிடம் ஊறவைக்கவும். பிறகு மசாலா தூள் அரைக்க மிக்ஸி ஜாரில், பட்டை, கிராம்பு, ஏலக்காய், கசகசா, சோம்பு சேர்த்து நன்கு பொடியாக அரைத்து தனியாக வைத்து கொள்ளவும்.

அடுத்தது பிரியாணி செய்ய ஒரு அகல பாத்திரத்தில் எண்ணெய் மற்றும் நெய் ஊற்றி, பிரியாணி இலை, அன்னாசி பூ, கல்பாசி, ஜாவிதிரி, மெல்லியதாக நறுக்கிய வெங்காயம் போட்டு பொன்னிறமாகும் வரை வதக்கவும். அடுத்தது பச்சை மிளகாய், இஞ்சி பூண்டு விழுது சேர்த்து நிறம் மாறி பச்சை வாசனை போன பின்பு அதில் தக்காளி சேர்த்து வதக்கவும்.

தக்காளி வதங்கிய பிறகு அரைத்த மசாலா தூள் மற்றும் மிளகாய்த்தூள், மஞ்சத்தூள், கல் உப்பு, கரம் மசாலா தூள், சேர்த்து மிதமான சூட்டில் வதக்கவும். அடுத்து வேக வைத்த மட்டன் துண்டுகளை தண்ணீரின்றி சேர்த்து கிளறவும். பிறகு ஒரு கப் அரிசிக்கு 1 1/2 கப் வேக வைத்த மட்டன் தண்ணீர் சேர்க்கலாம் (இல்லையென்றால் வெந்நீர் ஊற்றி நன்கு கலக்கவும்.

இதில் எலுமிச்சை சாறு தயிர் சேர்த்து நன்கு கலக்கவும். அரிசியை சேர்த்து கலந்து பாத்திரத்தை மூடி மிதமான சூட்டில் பத்து நிமிடங்களுக்கு சமைக்கவும்.

அரிசி பாதி வெந்த பின் பிரியாணியை லேசாக கிண்டி அதன்மேல் நெய் ஊற்றி கொத்தமல்லி இலை புதினா இலை தூவி வாழை இலையால் பிரியாணியை மூடவும். அடுத்தது பாத்திரத்தை அடுப்பிலிருந்து இறக்கி ஒரு தோசை தவாவை அடுப்பில் வைக்கவும். தோசை கல் சூடான பின் இறக்கிய பாத்திரத்தை அதன் மீது வைத்து தீயை நன்கு குறைக்கவும்.

அடுத்து பாத்திரத்தை தட்டு மூடி அதன் மேல் ஒரு கனமான தட்டை வைத்து 20 நிமிடங்களுக்கு தம் வைக்கவும். பிறகு 20 நிமிடம் கழித்து கொத்துமல்லி இலை சேர்த்து மெதுவாக கிளறி பரிமாறவும்.