நான் பித்தளை காபி பில்டர் உபயோகித்து உள்ளேன். பில்டரின் மேல் கப்பில் இரண்டு தேக்கரண்டி காபி தூள் சேர்த்துக் கொள்ளவும். அதன்மேல் பில்டர் உடன் கொடுக்கப்பட்ட குடையை வைத்து லேசாக அழுத்தவும். இதற்கு மேல் மீண்டும் இரண்டு தேக்கரண்டி காபி தூள் சேர்த்துக் கொள்ளவும். அதற்குமேல் ஒரு மேஜைக் கரண்டி சர்க்கரை சேர்க்கவும். இதனை மூடி வைக்கவும். சர்க்கரை சேர்ப்பதனால் காபியில் மெருகேறும்.

தண்ணீரை அடுப்பில் வைத்து 90 டிகிரி வரும் வரை சூடாக்கவும். சொல்லப்போனால் தண்ணீரில் லேசான பபுள்ஸ் வர வேண்டும் ஆனால் கொதிக்கக் கூடாது. இதை பில்டரின் மேல் கப்பில் கொடுக்கப்பட்டுள்ள விளிம்புவரை ஊற்றி மூடி போட்டு 20 நிமிடம் அப்படியே விடவும்.

பிறகு பாலை அடுப்பில் வைத்து கிளறிக்கொண்டே காய்ச்ச வேண்டும். இதனால் பாலில் எடு சேராமல் பாலின் தன்மை திக்காக இருக்கும். பால் காய்ந்த பின் மற்றொரு பாத்திரத்தில் ஒருமுறை நுறைக்க ஆற்றவும். இவ்வாறு செய்வதனால் பாலின் மேல் எடு சேராது.

20 நிமிடங்கள் கழித்து திறந்து பார்த்தால் ஊற்றிய தண்ணீர் காபி தூளுடன் கலந்து வடிந்து கீழ் கப்பில் டிகாக்ஷன் ஆக வந்திருக்கும்.

இப்பொழுது ஒரு டபரா எடுத்து அதில் உள்ள கிளாசில் 1.5 தேக்கரண்டி வெல்லம் சேர்த்துக் கொள்ளவும். இதோடு சுமாராக 25 மில்லி காபி டிகாக்ஷன் சேர்க்கவும். வெல்லத்திற்கு பதிலாக தேன் சேர்த்தும் செய்யலாம்.

பிறகு பாலை நுறைக்க ஊற்றவும். ஒருமுறை இதை டபராவில் ஆற்றவும். அவ்வளவுதான் சுவையும் மணமும் நிறைந்த பில்டர் காபி சூடாக தயார்.

குறிப்பு:
1. பித்தளை பில்டர் மற்றும் டபரா விற்கு பதில் சில்வர் இல் கூட பயன்படுத்தலாம்.
2. நாம் எடுக்கும் காபித்தூள் 80 சதவீதமும் 20 சதவிகிதம் சிக்கரி கலந்த பில்டர் காபிதூளை உபயோகப்படுத்தலாம்
3. தண்ணீர் மற்றும் பாலை கொஞ்சம் அதிகமாக எடுத்து சூடு செய்து கொண்டு தேவையானதை உபயோகித்துக் கொள்ளலாம்.
4. ஸ்ட்ராங்கான காபி விரும்புவோர் டிகாக்ஷன் ஐ கூடுதலாக சேர்த்துக்கொள்ளலாம்
5. திக் கான காபி சுவையாக இருக்கும் என்பதால் நான் எருமைப்பால் உபயோகித்து உள்ளேன். மாறாக பசும்பாலை சுண்டக்காய்ச்சி பயன்படுத்தலாம்.