સૌપ્રથમ સીંગ ને શેકી લો પછી એના ફોતરા કાઢી ને મિક્સરમાં અધકચરી પીસી લો.

હવે એક કડાઈમાં ગોળ ઉમેરો અને એમાં ઘી ઉમેરીને બરાબર મિક્સ કરો અને બે ચમચી પાણી ઉમેરી ગોળ ઓગળે ત્યાં સુધી બરાબર હલાવતા રહો. ગોળ પીગળી જાય પછી એમાં બબલ્સ થવા લાગશે. સતત હલાવ્યા કરવું. હવે ચાસણી નો કલર બદલાવા લાગે પછી એક બાઉલમાં ઠંડુ પાણી લો અને એમાં થોડી ચાસણી ઉમેરી ને ચેક કરો.જો ચાસણી એકદમ કડક લાગે અને તૂટી જાય તો ચાસણી તૈયાર છે અને જો રબરની જેમ વળી જાય તો હજુ ચાસણીને થોડી વાર ચઢવા દેવી અને ૨ મિનિટે ચેક કરવું.

હવે તૈયાર થયેલી ચાસણીમાં પીસેલી સીંગ ઉમેરી દો અને બરાબર મિક્સ કરી લો.

મિક્સ કર્યા બાદ તરત જ એક તેલ લગાવેલી જગ્યા પર ચીકી ને ઉમેરો અને વેલણથી વણી લો. સીંગ ની ચીકી છે એટલે થોડી જાડી જ રાખવી. હવે તરત જ કાપા પાડી લો અને અડધા કલાક સુધી ઠંડી થવા દો. ઠંડી થયા બાદ તેના પીસ અલગ કરીને કન્ટેનરમાં ભરી લો.