કુકરમાં ત્રણ ચમચાં તેલ મૂકી તેમાં આખાં લાલ મરચાં, અજમો, મરચું, હળદર અને હિંગ નાખી પાપડી, વાલના દાણા અને લીલવા(લીલી તુવેરના દાણા) નાખવા. સ્વાદ અનુસાર મીઠું નાખી ઢાંકણ બંધ કરી બે-ત્રણ સીટી વગાડી લેવી.

બટાકા શક્કરીયા અને રતાળુ ને છોલી ધોઈને ટુકડા કરવા. આ ત્રણે વસ્તુ એક કડાઈમાં ચાર-પાંચ ચમચાં તેલ મૂકી તેલ ગરમ થાય એટલે તેલમાં ચડવા દેવું.

ચણાના જાડા લોટમાં ઘઉંનો જાડો લોટ મીઠું, 1/2 ચમચી મરચું, 1/2 ચમચી હળદર, 1/2 ચમચી ધાણાજીરૂ એક ચમચી દળેલી ખાંડ અને તેલનું મોણ નાખી તેમા મેથીની ભાજીને સમારીને નાખવી. અને બધું બરાબર મિક્સ કરી કઠણ લોટ રાખી મૂઠિયાં વાળી ગરમ તેલમાં તળી લેવા.

રીંગણા ને ધોઈને વચ્ચેથી બે સાઈડ કાપા કરી ભરેલા શાક નો મસાલો બનાવી મસાલો રીંગણ માં ભરવો. એક વાસણમાં તેલ મૂકી તેમાં હિંગ નાખી રીંગણા વઘારવા અને ચડાવવા.

લીલા ધાણાને ઝીણા સમારી તેમા આદુ ની પેસ્ટ, લીલા મરચાની પેસ્ટ, તલ, વાટેલું લીલું લસણ, ખાંડ,મીઠું, ધાણાજીરું બધું નાખી બરાબર મિક્સ કરી મસાલો તૈયાર કરવો.
હવે એક કડાઈમાં તળેલા શક્કરિયા બટાકા અને રતાળુ નાખવા પછી તેમાં મેથીના મુઠીયા ટુકડા કરીને નાખવા. અને ભરેલા રીંગણ પણ નાખવા. પછી ચડેલા લીલવા અને વાલના દાણા પણ મિક્સ કરવા.

લીલા ધાણાં મિક્સ કરેલો મસાલો પણ નાખવો અને બધું બરાબર મિક્સ કરી ૨ ચમચા તેલ નાખી સ્વાદ મુજબ મીઠું 1/2 ચમચી ધાણાજીરૂ, એક ચમચી લાલ કાશ્મીરી મરચું, એક ચમચી દળેલી ખાંડ, ગરમ મસાલો મિક્સ કરી પાંચ મિનિટ ઢાંકણ ઢાંકી ચડવા દેવું.

તો તૈયાર છે ગરમા ગરમ સુરતી ઊંધિયું.નાયલોન સેવ થી ગાર્નિશ કરી સર્વ કરવુ.