સૌ પ્રથમ તો કેરી ને ધોઈ લો અને સરખી રીતે લૂછી ને એકસરખા કટકા કરી લો. મેં અહીં છાલ નથી ઉતારી. હવે એમાં મીઠું અને હળદર નાખી મીક્સ કરો અને 7-8 કલાક એમ જ રહેવા દો જેથી સરખું પાણી છૂટી જાય. 3-4 વખત હલાવી લેવું. પાણી બધું જ નિતારી લેવું. એક સુતરાઉ કપડાં ઉપર છૂટી છૂટી કેરી રાખી પંખા ની હવા નીચે સાવ કોરી થાય ત્યાં સુધી સૂકાવા દેવી.

હવે ગોળ ને ખમણી થી છીણી લેવો, જેથી સરસ રીતે ઓગળી જાય.

એક બાઉલમાં અથાણાં નો સંભાર લેવો, જેમાં રાઈ નાં કુરિયા, મેથી નાં કુરિયા, હીંગ, હળદર, મીઠું, તીખું લાલ મરચું પાઉડર, મીક્સ કરેલું હોય છે. હવે ધાણા નાં કુરિયા, વરિયાળી નાં કુરિયા નાખી મીક્સ કરો અને વચ્ચે થોડી જગ્યા કરી લો.

હવે વચ્ચે જગ્યા કરી છે ત્યાં મરી નાં દાણા, તજ, લવિંગ, હીંગ નાખી દો. રાઈ નુ તેલ જરા ધૂમાડો નીકળે ત્યાં સુધી ગરમ કરો અને જરા ઠંડુ થઈ જાય એટલે વચ્ચે રેડી દો. પછી બધું જ સરસ રીતે 5 મિનિટ સુધી મીક્સ કરો. હવે સૂકાઈ ગયેલી કેરી,કાશ્મીરી લાલ મરચું પાઉડર નાખી મિક્સ કરો અને કાચ ની બોટલ માં ભરી દો. ઉપર થી તેલ સરખું રેડી દો. રોજ દિવસ માં 2 વાર હલાવી લેવું, જેથી ગોળ 5-6 દિવસ માં બરાબર ઓગળી જશે.

તડકામાં રાખવાથી જલ્દી બની જાય છે, પણ મરચું પાઉડર નો રંગ બદલાઈ જાય છે. એટલે હું ઘર માં જ રાખું છું. ગોળકેરી નું અથાણું તૈયાર થઈ જાય એટલે જમવામાં આનંદ માણો..