प्रथम दुधी भोपळा स्वच्छ धून त्याचे साली काढून घेणे. नंतर किसणीने तो खिसुन घेणे. तो खिस हाताने अलगद दाबून त्यातील पाणी पिळून काढावे. व त्यात हळद, तिखट, धने पूड, ओवा, तीळ, 2 चमचे तेल आणि भरपूर कोथिंबीर, चवीनुसार मीठ घालून तो खिस हलवून घेणे. व 10 मिनिट झाकून ठेवावा.

नंतर त्या किसलेल्या भोपळ्या मध्ये 3 चमचे बेसन पीठ, ज्वारीचे पीठ व कणिक समावेल इतकी मिक्स करावी व एकजीव करून त्याचा घट्टसर गोळा मळून घेणे. तवा गॅस वर ठेवून गरम होई पर्यंत तो गोळा झाकून ठेवावा आणि लगेचच ठेपले करायला घेणे. (पीठ सैल होते) मळलेल्या पिठाचे मध्यम असे गोळे करून ठेपला बनवण्यासाठी घेणे.

एक गोळा घेऊन तो कोरड्या पिठात घोळून घेऊन पातळ अशी पोळी लाटावी. लाटून झाली कि गरम झालेल्या तव्यावर ठेपला मस्त एका बाजूने थोडा भाजला कि तो पालटून घेणे व त्यावर ब्रश ने किंवा चमच्याने तेल किंवा तूप लावावे. अशाप्रकारे दोन्ही ही बाजू मस्त खमंग तूप किंवा तेल सोडून भाजून घेणे.

वरील प्रमाणे सर्व ठेपले लाटून मस्त खमंग भाजून घेणे. वरील साहित्यामध्ये साधारण 9 ठेपले बनवून होतात.

हे ठेपले दही, लोणचे किंवा टोमॅटो केचउप सोबत गरमागरम खावेत. मस्त खमंग आणि चविष्ट असे हे ठेपले लागतात.