प्रथम सर्व साहित्य एका ठिकाणी घ्यावे.

एका परातीत भाजणी घ्यावी. त्यात ओवा व तीळ घालावे.

आता त्यात हिंग, हळद व तिखट घालावे.

जीरा पावडर, धणे पावडर व मीठ घालून घ्यावे.

गरम केलेले तेल घालून पिठात सर्व साहित्य मीक्स करून घ्यावे. आता त्यात गरम पाणी घालून पीठ छान मळून घ्यावे. पीठ खूप घट्ट किंवा खूप सैल भीजवू नये.

मळलेले पीठ 1/2 तास झाकून ठेवावे. अर्ध्या तासाने पाण्याचा हात लावून पीठ छान मळून घ्यावे. चकलीच्या साच्याला तेलाचा हात लावून त्यात पीठाचा गोळा भरून साचा बंद करावा. प्लास्टीकच्या पेपरवर हवे त्या आकाराची चकली घालावी.

चकलीचे पहिले टोक व शेवटचे टोक नीट दाबून घ्यावे. नाहीतर चकली तेलात टाकताच ती सुटते. अशा प्रकारे चकल्या पाडून घ्याव्या.

गॅसवर एका कढईत तेल गरम करायला ठेवावे. तेल गरम झाले कि त्यात चकली सोडावी. कढईत मावतील तेवढ्याच चकल्या घालाव्या म्हणजे उलट-पालट करायला सोपे जाते. चकल्या लालसर रंगावर तळून घ्याव्या व निथळणीत टिश्यू पेपरवर काढून ठेवाव्यात. तेल निथळले की पसरट भांड्यात काढून ठेवाव्यात.