मटकी एक दिवस आधी सकाळी भिजवून,दुपारी त्यातील पाणी उपसून फडक्यात बांधून ठेवा म्हणजे त्याला चांगले मोड येतील. कढईमध्ये तेल घेऊन त्यामध्ये मोहरी, जीरे, हिंग यांची फोडणी करा त्यामध्ये कढीपत्त्याची पाने घाला. बटाट्याची साले काढून त्याच्या छोट्या फोडी करून घ्या.

फोडणी चांगली तडतडली की त्यामध्ये हळद घालून मग भिजवलेली मटकी आणि बटाटा घाला. मटकी तीन ते चार मिनिट चांगली तेलात परतून घ्या. नंतर त्यामध्ये गोडा मसाला, तिखट, ओला नारळ घालून नीट मिक्स करून घ्या व या मिश्रणामध्ये साधारण अर्धा ते पाऊण कप पाणी घाला. सर्व व्यवस्थित मिक्स करून कढईवर झाकण ठेवून पाणी ओता, वाफेवर ही भाजी मंद आचेवर पंधरा ते वीस मिनिटं शिजू द्या.

मोड आलेली मटकी असल्यामुळे ती शिजण्यासाठी थोडासा वेळ लागू शकतो पंधरा-वीस मिनिटांनी मटकीचा दाणा हातात घेऊन बोटाने चेपून बघा ती व्यवस्थित शिजली असल्यास त्यामध्ये मीठ व गूळ घालून नीट मिक्स करा. आता झाकण न ठेवता भाजी तीन ते चार मिनिटे तशीच शिजवा. गरज असेल तर तुम्हाला हवे त्याप्रमाणे उसळी मध्ये पाणी घाला. बारीक चिरलेली हिरवी कोथिंबीर वरतून घालून गॅस बंद करा आणि झाकण ठेवून द्या. झाली आपली मटकीची उसळ तयार.