पाऊण वाटी अख्खे मसूर रात्रभर पाण्यात भिजत ठेवले. सकाळी २-३ वेळा स्वछ पाण्याने धुवून घेतले. एका भांड्यात २ वाट्या पाणी उकळवून घेतलं त्यात धुतलेले मसूर अर्धातास ठेवून दिले.

१ कांदा, १ टोमॅटो, अर्धी सुक्या खोबऱ्याची कवड, ६-७ लसूण पाकळ्या आगीवर भाजून घेतलं. त्यामुळे स्मोकी फ्लेवर येईल ग्रेव्ही ला.

भाजलेला १ कांदा, १ टोमॅटो, अर्धी सुक्या खोबऱ्याची कवड, ६-७ लसूण पाकळ्या सोबत अर्धा इंच आलं, २ हिरव्या तिखट मिरच्या, पाव वाटी पुदिना आणि थोडी कोथिंबीर कापून मिक्सर ला लावली आणि वाटण बनवून घेतलं. वाटण करताना थोडं मीठ टाकलं.

कढईत २-३ चमचे खाद्यतेल तापवून त्यात १ चमचा कांदा लसूण मसाला (तिखट जास्त हवं असल्यास प्रमाण वाढवावं) आणि २ चमचे घरचा लाल तिखट मसाला टाकून फोडणी द्यायची. मसाला तेलावर टाकताना आच मंद असेल याची काळजी घ्यावी. तेलावर मसाला फुटू लागला कि त्यात वाटण घालायचं. मिक्स करून झाकण ठेवून एक उकळी येऊ द्यावी.

एक उकळी आली कि त्यात उकळलेल्या पाण्यात ठेवलेले मसूर उकळीवर सोडायचे. तेच पाणी गरजेनुसार मसूर सोबत ऍड करायचं.
गरज वाटल्यास मीठ टाकायचं. झाकणावर पाणी ठेवून १० मिनिटं मिश्रण शिजू द्यायचं. १० मिनिटांनी एकदा ढवळून मसूर शिजल्याची खात्री करायची. गॅस बंद करून उरलेली चिरलेली कोथिंबीर भुरभूरवून वाफाळत्या भातासोबत अख्खा मसूर सर्व्ह करायची. सोबत तोंडीला घरचं दही असेल तर उत्तम :)
~ सुप्रिया घुडे