प्रथम गव्हाच्या पिठात दोन चमचे बेसन घालून मीठ आणि साजूक तुपाचे दोन चमचे मोहन घालून नेहमीच्या पिठाप्रमाणे मळुन घ्यावे आणि दहा मिनिटं ठेवून द्यावे.

खमंग भाजलेले तीळ, शेंगदाणे मिक्सरला बारीक करून घ्यावे. त्याचप्रमाणे दोन चमचे बेसन तांबूस होईपर्यंत कोरडे भाजून घ्यावे तेही तिळामध्ये मिक्स करावे. जायफळाची-वेलचीची पावडर हे सगळं नीट मिक्स करून सारण बनवून घ्यावे.

आता मळलेल्या पिठाचे गोळे करून त्यात तिळाचे सारण भरून मोदकासारखा आकार करून (सारण खूप घट्ट भरावे) पोळी दोन्ही बाजूने लाटावी, जेणेकरून तिळाचे कोरडे सारण पूर्ण पोळीवर पसरते आणि तेवढेच पातळही लाटता येते.

मध्यम तापलेल्या तव्यावरती पोळी दोन्ही बाजूंनी कोरडी प्रथम खमंग भाजून घ्यावी आणि नंतर शेवटी तुपाने दोन्ही बाजूंनी परतून गरमागरम खुसखुशीत खमंग पोळी तयार. ही पोळी सर्व्ह करताना वरून आणखी तुपाची धार सोडावी. लहान मुलांपासून मोठ्यांना ही पोळी खूप आवडते.