முதலில் எல்லா காய்கறிகளையும் படத்தில் காட்டியுள்ளவாறு 3 அங்குல அளவிற்கு, சன்னமாக அரிந்து கொள்ளவும். கத்தரிகாய் மற்றும் வாழைக்காயையும் அதேபோல் நீளவாக்கில் அரிந்து தண்ணீரில் போடவும். ஒரு கப் புளிக்காத கெட்டித் தயிரை எடுத்து வைத்துக் கொள்ளவும். ஒரு ஸ்பூன் சீரகம், 4 பச்சைமிளகாய், 5 சின்ன வெங்காயம் ஒரு கப் துருவிய தேங்காய் எடுத்து வைத்துக் கொள்ளவும்.

கெட்டி வாணலி அல்லது நான்ஸ்டிக் கடாயில் எல்லா காய்கறிகளையும் சேர்த்துக் கொள்ளவும் அதில் கால் ஸ்பூன் மஞ்சள் தூள், மற்றும் தேவையான அளவு உப்பு சேர்த்து கலந்து விடவும். தண்ணீர் சேர்க்க வேண்டாம். வெள்ளை பூசணி நிறைய சேர்ப்பதால் அதிலுள்ள தண்ணீரே வேகவைக்க போதுமானது. மேலும் உப்பும் சேர்ப்பதால் காய் தண்ணீர் விடும். மிதமான தீயில் மூடி வைத்து காய்கறிகளை வேக விடவும். அடிக்கடி காய்களை குலுக்கி விட்டு வேகவிடவும்.

அதே சமயத்தில் எடுத்து வைத்துள்ள தேங்காய் துருவல், சீரகம், சின்ன வெங்காயம் மற்றும் பச்சை மிளகாயை மிக்ஸியில் கொஞ்சம் கரகரப்பாக அரைத்துக் கொள்ளவும். தயிரை நன்கு கடைந்து வைத்துக் கொள்ளவும். 10 நிமிடம் கழித்து மிகவும் கடினமான காய் வெந்து விட்டதா என்று பார்க்கவும். சேனை முருங்கைக்காய் இதை பார்க்கலாம் காய்கள் வெந்து விட்டால் கடைந்து வைத்த தயிரை சேர்த்து கலந்துவிட்டு 2 நிமிடம் திறந்துவிட்டு வேக விடவும். காய்களில் தயிரை கலக்கும்போது காய்கள் குழையாமல் மிதமாக கலந்து விடவும்.

2 நிமிடங்கள் கழித்து அரைத்து வைத்த தேங்காய் விழுதை சேர்த்து நிதானமாக கலந்துவிடவும். இரண்டு நிமிடம் வரை சூடுபடுத்தவும். பிறகு பச்சை கறிவேப்பிலை மற்றும் கால் கப் தேங்காய் எண்ணெய் சேர்த்து கவனமாக கலந்து விடவும். மூடி வைத்து விடவும்.

சுவையான மலபார் அவியல் தயார்.