கேரளா ஸ்டைல் மட்டன் ஸ்டியூ

மட்டன் ஸ்டியூ செய்யும் பொழுது மட்டனை பசும்பாலில் கொதிக்க விட்டு, பாலை வடித்தபின் சமைக்க ஆரம்பித்தால் ருசி கூடுதலாக இருக்கும். இது போல நானும் பசும்பாலில் 5 நிமிடம் கொதிக்க வைத்த மட்டனை குக்கரில் சேர்த்துள்ளேன். பாலை வடித்து விட்டு மட்டன் துண்டுகளை மட்டும் குக்கரில் சேர்க்க வேண்டும். கூடவே ஒரு உருளைக்கிழங்கு கருவேப்பிலை ஒரு கொத்து, மட்டன் மூழ்கும் வரை தண்ணீர், ஒரு தேக்கரண்டி உப்பு சேர்த்து குக்கரை மூடி ஒரு விசில் வந்தபின் 10 நிமிடங்கள் குறைவான தீயில் வேக வைத்து கொள்ளவும்.

வெந்த உருளைக்கிழங்கை தனியாக எடுத்து தோலுரித்துக் கொள்ளவும். தேங்காயை துருவி அரைத்து, முதல் பால் ஒரு கப் மற்றும் இரண்டாம் பால் ஒன்றரை கப் அளவு எடுத்துக் கொள்ளவும். வேக வைத்த உருளைக்கிழங்கை மசித்து தேங்காயின் முதல் பாலில் சேர்த்து கலந்து வைக்கவும். உருளைக்கிழங்கு சேர்ப்பதனால் ஸ்டியூ கொஞ்சம் கெட்டியாக வரும்.

ஒரு மண் சட்டியை அடுப்பில் வைத்து தேங்காய் எண்ணெய் சேர்த்து சூடு செய்யவும். இதில் பட்டை கிராம்பு ஏலக்காய் பிரியாணி இலை கல்பாசி அன்னாசிப்பூ பச்சை மிளகாய் சோம்பு ஆகியவற்றை சேர்த்து தாளிக்கவும். இஞ்சியை மெலிதாக நீளவாக்கில் நறுக்கி இதில் சேர்க்கவும். சின்ன வெங்காயத்தை ஒன்றும் பாதியுமாக நறுக்கி அதில் சேர்த்து வதக்கவும்.

வெங்காயம் நிறம் மாறிய பின் வேக வைத்த மட்டனை அதிலிருக்கும் தண்ணீருடன் மண்சட்டியில் சேர்க்கவும். இதில் இரண்டாம் பாலை சேர்த்து மூடி போட்டு 10 நிமிடம் கொதிக்க விடவும். பிறகு உருளைக்கிழங்கு கலந்த முதல் பாலை சேர்த்து ஒரு கொத்து கறிவேப்பிலை சேர்த்து தேவையான அளவு உப்பு சேர்த்து மூடி போட்டு 5 நிமிடம் கொதிக்க விடவும்.