1 1/2 கப் கோதுமை மாவை உப்பு 2 டீஸ்பூன் ஆயில் சேர்த்து தண்ணீர் விட்டு பிசைந்து, மேலே சிறிது எண்ணெய் தடவி 1/2 மணி நேரம் மூடி வைக்கவும்.

சப்பாத்தி தேய்க்கும் கல்லில் தேய்த்து, தோசைக்கல்லில் ஆயில் சிறிது விட்டு இருபுறமும் பொன்னிறமாக சுட்டு எடுக்கவும்.

1 கப் காய்ந்த பட்டாணியை கழுவி நான்கு மணி நேரம் ஊறவைத்து, குக்கரில் சேர்த்து ஒரு விசில் வேக வைத்து தண்ணீரை வடித்து விடவும். 1பெரிய வெங்காயம்,1 பச்சை மிளகாய், 1 தக்காளியை பொடியாக நறுக்கி வைக்கவும். மசாலா அரைப்பதற்கு 2 டேபிள் ஸ்பூன் தேங்காய் துருவல், 1 டீஸ்பூன் சோம்பு, 1 டீஸ்பூன் கசகசா, 7 பல் பூண்டு, 1 துண்டு இஞ்சி, 5 முழு முந்திரியை எடுத்து வைக்கவும்.

குக்கரில் 2 டீஸ்பூன் ஆயில் விட்டு மசாலா அரைப்பதற்கு தேவையான பொருட்களை நன்கு வதக்கி அதனுடன் 1 1/2டீஸ்பூன் தனியா தூள், 1 டீஸ்பூன் மிளகாய்த்தூள், 1 டீஸ்பூன் கரம் மசாலாத்தூள், 1/2 டீஸ்பூன் சீரகத்தூள் சேர்த்து நன்கு பிரட்டி விடவும். இவை அனைத்தையும் ஆற வைத்து மிக்ஸியில் சேர்த்து விடவும்.

சிறிது தண்ணீர் சேர்த்து நன்கு நைஸாக அரைத்து விடவும். குக்கரில் 2 டீஸ்பூன் ஆயில்,2 டீஸ்பூன் நெய் விட்டு,1 டீஸ்பூன் சீரகம் சிறிது கறிவேப்பிலை தாளித்து, நறுக்கிய வெங்காயம் பச்சை மிளகாய் சேர்த்து நன்கு வதக்கி விடவும்.

அதனுடன் நறுக்கிய தக்காளியை சேர்த்து வதக்கி, 1/2 டீஸ்பூன் மஞ்சள்தூள், உப்பு சேர்த்து விடவும். அரைத்த மசாலாவை சேர்த்து சிறிது தண்ணீர் விட்டு கொதிக்க விடவும்.

வெந்த பச்சை பட்டாணியை சேர்த்து வேக விடவும். நன்கு கலக்கி விட்டு குக்கரை மூடி ஒரு விசில் வேகவிடவும்.

சுவையான பட்டாணி குருமா ரெடி.😋😋 நான் பட்டாணி குருமாவிற்கு சப்பாத்தி செய்து பரிமாறினேன். அருமையாக இருந்தது.