பச்சரிசியை நன்கு கழுவி ஒரு துணியின் மேல் போட்டு ஆறவிடவும். கையில் எடுத்து பிடித்தால் இலேசாக அரிசி கையில் ஒட்ட வேண்டும் அதுதான் அரைக்க வேண்டிய பதம்.

பின்னர் அரிசியை எடுத்து மிக்ஸி ஜாரில் இரண்டு ஏலக்காய், சுக்கு பொடி சேர்த்து பொடித்து சலித்து வைத்துக் கொள்ளுங்கள். வீட்டின் பக்கத்தில் அரிசி அரவை மில் இருந்தால் அதில் கொடுத்து பொடிக்கலாம். கொஞ்சமாக இருப்பதால் நான் மிக்ஸியிலேயே பொடித்தேன்.

பின்னர் வேறு ஒரு பாத்திரத்தை ஸ்டவ்வில் வைத்து வெல்லம், தண்ணீர் சேர்த்து உருகி வரும் வரை கலக்கவும். பின்னர் வடித்து எடுத்து, மேலும் பத்து நிமிடங்கள் நன்கு கலக்கவும். பாகு தன்மை வரும் போது கொஞ்சம் திக் ஆக மாறும். அப்போது எடுத்து தண்ணீரில் போட்டால் வெல்லப்பாகு கரையாமல் ரௌண்டாக உருட்ட வரவேண்டும். அது தான் அதிரசம் மாவு கலக்க சரியான பாகு பதம்.

பாகு உருட்டு பதம் வந்ததும் தயாராக வைத்துள்ள மாவை கொஞ்சம் கொஞ்சமாக பாகில் தூவி கலக்கவும்.

பாகில் மாவு சேர்த்து கலக்கி கொண்டே இருக்கவும். நன்கு கெட்டியாக வரும் வரை மாவு சேர்க்கவும்.

பின்னர் எடுத்து வேறு ஒரு பாத்திரத்தில் மாற்றி மூடி வைக்கவும். மறுநாள் எடுத்து அதிரசம் தட்டவும். அப்போதே வேண்டுமானாலும் செய்யலாம். ஆனால் மாவு கொஞ்சம் தண்ணீர் போல் இருக்கும். எனவே தட்ட வராது. அவசரம் எனில் மேலும் கொஞ்சம் மாவு சேர்த்து கலந்து அதிரசம் மாவு கெட்டியானதும் தட்டவும். மறு நாள் மாவு கொஞ்சம் கலர் மாறும்.

அதிரசம் செய்ய விரும்பும் போது வாணலியை ஸ்டவ்வில் வைத்து எண்ணை ஊற்றவும். நான் கடலை எண்ணையில் செய்துள்ளேன். ஒரு வாழை இலை அல்லது அலுமினிய
பாயில் பேப்பரில் மாவை வைத்து வட்டமாக தட்டி நடுவில் ஒரு ஓட்டை போடவும். அப்போது நன்கு வேகும். பின்னர் காய்ந்த எண்ணையில் போடவும். இரு பக்கமும் திருப்பி போட்டு எடுக்கவும்.

மிதமான சூட்டில் வைத்து சுட்டெடுக்கவும். அதிக சூடு இருந்தால் அதிரசம் கருப்பாக மாறிவிடும். ஆனால் உள்ளே வேகாது. கோல்டன் கலர் வந்தவுடன் எடுக்கவும். ஒரு சிலர் எடுத்தவுடம் அதிரசத்தில் உள்ள எண்ணையை இரண்டு கரண்டிகள் வைத்து பிழிந்து விடுவார்கள். நான் அப்படி பிழியவில்லை. சுட்டெடுத்த அதிரசத்தை ஒரு டிஸ்ஸு பேப்பர் மேல் வைத்து விடவும்.

பொங்கல் ஸ்பெஷல் ஸ்வீட் இந்த அதிரசம். அனைவரும் செய்து அசத்துங்கள்.